Dawa ka KSU ïa ka DC ban pynsangeh mardor ïa ka hukum shah plie ki dukan ha Mahadev

Shillong, Risaw 18: Ka Khasi Students’ Union (KSU) ka la dawa ïa ka Deputy Commissioner ka East Khasi Hills, ba kan pynsangeh mardor ïa ka hukum ba shah ban plie ïa ki dukan ha Mahadev Khola Dham kumba la pynmih ha ka hukum ba shipor ha kine ki sngi.
Halor kane ha ka shithi ba la phah sha ka Deputy Commissioner Kong RM Kurbah ha ka sngi Thohdieng, u President ka KSU Laban Circle samla Reuben Najiar ula ong, “Ngi kyntu da ka jingsngewrit ïa phi ba ïa kane ka hukum dei ban pynsangeh noh mardor lem kumta ka Seng kan ym burom bad ïaid katkum ka jingïakren bad ka rai ba la shim ha ka 20 tarik Nailar 2025”.
U nongïalam ka seng u Samla Reuben ula kam ba ka hukum ba pynmih da ka DC ha ka 15 tarik Risaw ka ïaid pyrshah ïa ki rai ba la shim ha ka 20 tarik Nailar, ha kaba la mynjur ban pynneh ïa ka jinglong jingman tat hadien ba ka Sorkar ka la wanrah ïa ka jingpynbeit kaba thikna.
Shuh shuh ka Seng ka la pynsngew ïa ka jingsngewkhia halor kiba bun ki mat ha Mahadev Khola Dham kynthup ïa ka jingshong ïing beaiñ, ka jingshna dukan, ka jingpyntuid jakhlia sha ki wahduid bad ka jingpynkheiñ ïa ki kyndon ka National Green Tribunal (NGT).
La ong ba wat hapdeng shibun ki shithi ba la phah sha ki bor khmih, kine ki mat ki dei kiba khlem pat leh eiei, kaba pynbor ïa ka KSU ba kan leh eiei noh dalade ban pynsangeh ïa ka jingshna bad khang dam ïa ki dukan kiba long beaiñ.
Ka seng ka la ong, “Ka hukum ba pynmih da ka DC ka ïaid pyrshah ïa ka rai ba la shim ha ka 20 tarik Nailar 2025 bad kaba pynkheiñ ruh ïa ka United Khasi Jaiñtia Trading by Non-Tribal Act, 1952. Ha ka jingshisha bad katkum ka aiñ, ka DC kam don bor ban ai jingbit ïa ki bar jylla ba kin plie ïa ki dukan bad ban kheiñ troiñ ïa ki bor ba la pynkup ha ka Khasi Hills Autonomous District Council (KHADC).”