Khlierhiat jylliew 11: Kum shibynta ban iarap ia ki samla wad kam bad ruh ban kyntiew ia ki sap ki phong jong ki samla, ka Khasi Students Union East Jaiñtia Hills District, ka la dawa na u Deputy Commissioner ka East Jaiñtia Hills District ban pynioh noh da ka Industrial Training Institute lane ka Vocational Training Centre ha Khliehriat, halor kane ka jingdawa ka seng myn ha ka 9 tarik mynta u bnai ka la leit ban buh da ka jingthoh ha khamt u Deputy Commissioner.
Haba kren sah ki pathai khubor, u General Secretary jong ka Khasi Students Union East Jaiñtia Hills District, u bah K.S.Suchiang, u la ong ruh ba “Mynta la bun tylli ki snem ngi la ioh ia ka district la jong bad sngew khia ruh ban ong ba ka dei kawei na ki district kaba dang sah dien, kane ka jingdawa jong ngi ia kane ka Vocational Training Centre lane ka Industrial Training Institute ka dei namar ba ka seng ka la lap ba bun ki samla jong ka district khamtam ki samla kiba la pyndep ia ki jingpule jong ki ha ki kyrdan bapher bapher bad don ruh ki samla kiba ymlah shuh ban bteng ia ka jingpule jong ki, te ka jingdawa jong ngi ban don kane ka centre hapoh ka district ka long kaba donkam haduh katta katta, namar ngi tip ba ka sorkar hi kam lah ban ai kam ia baroh ki samla wad kam, ngi sngewthuh ba da ka jing don kane ka centre kan iarap shibun ia ki samla wad kam, ngi tip ba ki samla ki don ruh la ki sap ki phong bapher bapher bad lyngba kine ki Centre kan iarap ban kyntiew ia ki samla don sap”.
“Haba kylli na u Deputy Commissioner halor kane ka ITI, u ong ba ka la don ha ka ophis ba rim jong u DC, te halor kane u la ong ruh ba ka KSU ka lah ban ai jingmut ban jied ia ki jait jingpule (Course), kiba hap ban ioh ha katei ka ITI, te ka seng ka shim ruh ia ka synjam ban pyntip sha ki paidbah ba ki paidbah ruh ki lah ban ai jingmut lem shaphang ki jait jingpule ki ban buh ha katei ka ITI, lada ngi ioh ia kane ka ITI kin ai jinghikai ia ki samla ki jinghikai bapher bapher, te na kane ki lah ruh ban ieng hala ki jong ki kjat ban seng ia ki kam ki jam, nga ai nuksa ba shibun ki samla kiba pyrshang ban wad kam sha ki karkhana pynmih dewbilat, ki tang shu aplai kam hangtei, ka mih pynban ka jubaba ba ki samla kim pat don jingtbit (skill) ha ka kam, hynrei ngi don ka jingkyrmen ba lada kane ka ITI Centre ka don ia ka ophis hapoh ka district ki samla kin sa iohlad ban pyntbit ialade bad lashai la shisngi kan long kaba suk ia ki ha ka wad kam wad jam, ym tang ha kita ki jingtrei ha ki karkhana hynrei kin ioh lad ruh ban seng ia ki kam la jong kum ki karkhana kiba rit kum ki workshop bad kiwei kiwei ki lad lada kan don kane ka Skill Development Training Centre lane ka ITI ha Khliehriat” la bynrap u bah Suchiang.
Halor kane ka jingdawa, ki dkhot jong ka seng na East Jaiñtia Hills District ba kynthup ruh u President, u bah Streamly Suchen, Asst General Secretary, u bah Pynshaikupar Dkhar, u Finance Secretary, u bah Shaniahskem Dkhar, u Asstt Finance, u bah Cherity Suja, u Education Secretary, u bah Emmon Chyrmang ki la ioh ruh ban ia phylliew jingmut bad u Deputy Commissioner, u Abhilash Banarwal, IAS halor shibun kiei kiei kiba kyntiew ia ki samla jong ka district bad ruh ban wanrah ia ka bha ka miat hapoh ka district.
