Dawa ka KSU- East Jaiñtia Hills ban pynkynriah noh mardor ïa ki shipai BSF na jingkieng Sonapyrdi

Khliehriat Jylliew 12: Ka Khasi Students Union East Jaiñtia Hills District, na ka por sha ka por ka la ju pynpaw ka jingsngew khia bad sngew bitar halor ka jingleh khlemakor ki shipai Border Security Force kiba ju ieng pahara ha jingkieng Sonapyrdi, ha ka jingthoh ba la phah sha u Deputy Commissioner myn ha ka 9 tarik mynta u bnai, ka seng ka la dawa ba dei ban pynkynriah noh mardor ia kitei ki shipai na katei ka jingkieng Sonapyrdi bad ruh na Ratacherra.
Katkum ka shithi ba la soi kyretng da u President KSU East Jaiñtia Hills District, u bah Streamly.S.Suchen bad u General Secretary, u bah K.S.Suchiang, ka seng ka la pynpaw ba myn ha ka 2 tarik u lber 2023, ki shipai BSF kiba ieng pahara ha katei ka jaka, kiba don ha ki uniform bad ha ki tiar (suloi) ki la ktah kti ia uwei u khynnah skul uba na ka shnong Huroi katba u dang iaid lynti ban leit sha skul, kane ka jingjia ka la pynsyier ia ki paidbah kiba dei iaid lyngba na katei ka jaka ba don ki shipai.
Ka seng ka pynrem jur ia ka jingleh donbor kitei ki shipai, namar kane ka jingleh don bor ki shipai ka ju jia man ka por.
Haba kren sha ki pathai khubor u bah K.S.Suchiang u la ong “ U Deputy Commissioner, u la ong ba katkum ki kyndon jong ka Ministry Home Affairs, na u laiñ khappud 50 kilo mitar ki dang lah ki shipai ban shong, hooid nga kubur ia kata, hynrei mynshwa ka don tang 20 kilo mitar na ka jaka ba ker sainar ha khappud (Border Fencing), te hangne ngi kwah ba ka sorkar ban pyndunna noh sha ka 20 kilo mitar ym ban buh haduh 50 kilo mitar namar kane kan ktah ia ki paidbah kiba leit ba wan, na ka liang u DC u la ong ba un sa iakren bad ki bor kiba halor ban iakren bad ka MHA ban shim khia ia kane ka kam ba ki paidbah ki ia kynduh jingeh”
Shuh shuh, la ong ba ha East Jaiñtia Hills District, ki don haduh ar tylli ki ktem jong ki shpiai BSF kiba don ha surok national highway, kawei ka don ha Ratacherra bad ha Sonapyrdi, ka seng ka pynkynmaw ruh ba dang ha ki snem kiba la leit ka Dorbar Shnong Sonapyrdi ki la dep ban dawa na ka tnat pulit ban pynkynriah noh, hynrei ngi iohi ba ki shipai ki dang don beit haduh mynta ha katei ka jaka ha Sonapyrdi
“Na ka liang ka seng, ngi sngew ba kam long kaba bha ba ki shipai kin don ha katei ka jaka ha surok national highway, namar haba ong shipai BSF ki la dei ban don sha ki jaka ba khappud bad ka ri Bangladesh, ka jingdon kitei ki shipai ka la kylla long pynban ka jingthut ia ki nongshong shnong jong ka Huroi, Hingaria, Lailong, Lejri bad kiwei kiwei ki shnong kiba dei iaid lyngba na katei ka jaka ba don ki shipai namar ki ju khynra ia ki kali ba iaid lyngba khlem kano kano ka daw, kane ka long tang ka jingpynthut kai ia ki paidbah bad ka wanrah jinghseptieng jingsyier ia ki kynthei ki khynnah, ngi iohi ruh dang ha kine ki khyndiat bnai, ba ki la don buh ki Dorbar Shnong, kiba la ia soi ha ka shithi ba la phah sha u Deputy Commissioner, kiba la dawa ban pynkynriah noh ia ki shipai kiba ieng pahara ha surok national highway ha Sonapyrdi bad ruh ha Rata-cherra,”pynpaw u bah Suchiang.