Khliehriat iaïong 01: Ka jinglang ka um ha pdeng surok ha kiba bun ki bynta jong ka surok National highway ha East jaintia Hills ka la buh jingeh ïa ki kali ba leit ba wan, ka um ka la tap lut ïa ka surok baroh kawei.
Na ka liang ka Khasi Students Union Narpuh Circle ka dawa na ka National Highway Authority of India bad kumjuh ruh na ka company shna surok, ka G.R. Infra ba ka dei ban pyllait mardor ïa ka um kaba lang ha surok bah ha Lumshnong kaba la i kum ka thwei.
Kane ka jaka ba lang um kum ka thwei ka jngai tang kumba 100 mitar na Lumshnong Police Station, ki dkhot ka seng ki lap ruh ba kito kiba iaid da ka kjat ki hap ban ñiom na ki lynti khlaw ki ba don ha shiliang ka surok khnang ban lait sha shiliang namar la kah lynti da ka um ha kaba kito kiba iaid da ka kjat ki shem jingeh ban iaid na um.
Na ka liang, ka seng lyngba u kyrwoh na u General Secretary KSU Narpuh Circle, u samla Sanatomba Bamon, u ong ba ka seng ka dawa ruh ba ka NHAI bad ka G.R.Infra ka dei ban shna bha ïa ki nala tuid um kiba heh ha baroh ar liang ka surok bad dei ban shna da kiba paka, kiba skem khnang ba ka um slap kan nym wan lynshop sha surok bah.
“Ka jingbym don ki nala tuid um kiba biang ka um ka lynshop beit ha surok ba iaid ki kali bad kane ka wanrah ruh ïa ka jingjot jingjulor ka surok, lada ka um slap ka lang ha pdeng surok kumne ka buh jingeh khamtam eh ïa ki kali rit, kynthup ki kali kamai bad ki kali shi met kiba donkam ban iaid lyngba na kane ka surok bah national highway” pynkut u kyrwoh.
