Nongpoh, Risaw 11: Ka Khasi Student Union, North Khasi Hills District Unit ka la mih shakhmat ban dawa ba dei ban don kawei ka jaka thoh eksam MPSC ha Ri-Bhoi District ban pynsuk bad pynjan ïa ki samla wadkamhaka leit ka wan.
Halor katei ka bynta na ka liang ka seng KSU ka la leit ruh ban ïakynduh syndon ïa u Deputy Commissioner ka Ri-Bhoi u Abhilash Baranwal ban ai ruh da ka dorkhas ba kum ka seng ka la sngewdei ban don noh kawei ka jaka thoh eksam MPSC ha Ri-Bhoi District bad hakajuh ka por ban dawa ruh ïa ka jingthung kam kaba khuid ha kaba ïadei bad ka District Selection Committee.
Haba kren sha ki lad pathai khubor na ka liang u Samla James H Mawphñiang u la ong ba hadien bun ka jingud jong ki samla ha kaba ïadei bad ka leit ka wan bad ka jingjngai ban leit thoh ïa ki eksam MPSC shaduh nongbah Shillong, ka seng ka la sngewdei ban dawa na ka sorkar ban pyrkhat lem ïa ka jingeh jong ki samla wadkam khamtam ban pynjan ïa ka jaka thoh eksam bad ban buh noh kawei ka jaaka thoh eksam ha Ri-Bhoi District.
Nalor ka jaka thoh eksam ka seng ka la ioh ruh ban pynsngew halor ka ka thungkam thukam khamtam ki post ba la pynbna da ka District Selection Committee ba ka dei ban long kaba khuid ba suba khlem da don kano kano ka jingleh shilliang khmat ryngkat ka jingpynsted ban pynlong ïa ki eksam kumba la dep pynbna ïa ki kam bapher bapher kiba dang lait bad ruh ban buh ruh da ki Video Recorder haka por ba leh ïa ka Personal Interview.
