Shillong: Ka Khasi Students Union (KSU) Tyrsad circle mynta ka sngi ba ar jong ka 5 tarik Naitung ka la leit ban ïakynduh ïa u Myntri ba peit ïa ka tnad pule puthi jong ka jylla u Bah Lahkmen Rymbui ban dawa ba ka sorkar ka dei ban ban buh ïa ki tnad pule Science bad Commerce ha Tyrsad Higher Secondary School.
Haba kren sha ki lad pathai khubor, u President ka KSU Tyrsad Circle u Samla Khraw Rynjah u la ïathuh ba kumba long mynta kam pat don satia kawei ruh ka jaka pule ha kane ka thaiñ kaba don ïa kine ki tnad pule bad ka la dei ka por ba ka sorkar kan buh ïa kine ki tnad pule ha kane ka thaiñ khnang ba kan long ka jingmyntoi ïa ki samla pule kiba wan na ka ïing ka sem ba duna ka ïoh ka kot bad kiba ym lah ban phah sha ki skul bad ki jaka pule ha nongbah Shillong kin lah ban bteng ïa ka jingpule.
“Kumba ka long mynta, ka Tyrsad Higher Secondary School kaba la seng palat 50 snem ka don tang ka tnad Arts bad na ka liang ka seng ngi dawa na ka sorkar ba kan buh noh ïa ki tnad pule Science bad Commerce ha kane ka skul kaba ai jingshakri ïa palat 50 tylli ki shnong ha kane ka dong ka thaiñ” ong u Bah Khraw
Une u nongïalam ka KSU u la ïathuh ba long kaba donkam eh ban kyntiew kyrdan ïa kiba bun ki skul ha kane ka thaiñ namar kumba long mynta tang kane ka skul Tyrsad kaba lah ban ai ka jinghikai kaba paka ha kiba bun ki shnong.
