Shillong, Jymmang 28: Ka Khun Hynñiewtrep National Awakening Movement (KHNAM) ha ka sngi Balang ka la dawa ïa ka Khasi Hills Autonomous District Council (KHADC) ban pynsangeh ïa baroh ki jinglum khajna ba la kynnoh ba ki dei kiba beaiñ da ki khyrdop lum khajna ka tnat forest bad ki kali shimet.
Kane ka long katkum ka jingshem jong ka RTI kaba la pynpaw ba ki la don haduh 25 tylli ki khyrdop talasi ne check gate kiba la buh da ka tnat forest jong ka KHADC ha ka snem 2025-26.
Na kine, 16 tylli dei kiba don ha Ri Bhoi District, 4 tylli ha East Khasi Hills District, 3 tylli ha West Khasi Hills bad kawei kawei ha Eastern West Khasi Hills bad South West Khasi Hills.
Ka jingthmu jong kine ki khyrdop talasi ka long ban lum ïa ki khajna na ki mar kiba mih na ki khlaw.
Ka RTI ka pynpaw ruh ba 8 tylli ki khyrdop ki khlem ai kano kano ka khajna na ka bynta ka Council (zero revenue) katkum ba la pynpaw ha u bnai Ïaïong mynta u snem nalor ka jingbuh ïa ki patrolling station.
“Ngi sngew kyndit ban tip ba ki la don palat 25 tylli ki forest check gate, ha kaba 16 tylli ki don ha Ri Bhoi District. Watla ka jingthmu jong ka jingbuh ïa kine ki forest check gate ka long ban lum ïa ki khajna na ki mar ba la pynmih na ki khlaw, bad ka long kaba sngewsih ban tip ba kine ki juh ki forest check gate ki lum khajna na ki tiar kiba kongsan, na ki mar rep bad ki tiar ba pynmih na ki karkhana,” ong u working president ka KHNAM u Bah Thomas Passah ha ka shithi ba la phah sha u CEM ka KHADC u Bah S Rynjah.
“Lada kine ki 16 tylli ki check gate ki lum khajna na ki mar rep khlem artatien kan lam sha ka jingkiew dor ki mar ki mata jong ki tiar kiba kongsan kiba ktah ïa ki nongshong shnong ka thaiñ. Namar kata ngi dawa ïa ka KHADC ban pynthikna ba kam dei ban don shuh ka jinglum khajna beaiñ da kine ki khyrdop talasi,” u la ong.
Haba buh jingkylli ïa ka rai jong ka council ban buh ïa ki patrolling station, u Bah Passah u la ong ba la don kiba ïathuh sha ka party ba ki la don ki briew kiba la wan da ki kali shimet kiba donkti ban lum beaiñ ïa ki khajna na ki kali khamtam ha ka por mynmied ha ka kyrteng jong kine ki patrolling station.
“Kane kadei kaba beaiñ. Lada ka KHADC ka sngew ba donkam ban buh ïa kine ki patrolling station, ka dei ban buh da ki kali jong ka council,” u la banjur.
