Dawa ka KHADC ban pynbeit thymmai ïa ka Building Bylaws ban weng jingeh kiba duna ka ïoh ka kot

Shillong, Risaw 22 : Ka Khasi Hills Autonomous District Council (KHADC) ka la mynjur da ka resolution kaba kyntu ïa ka sorkar jylla ban pynkylla ïa ki kyndon shna ïïng shna sem ne ka Building Bylaws khnang ban weng ïa ki jingeh ba ki longïïng kiba duna ka ïoh ka kot ki ïa kynduh.
Haba wanrah ïa kane ka Resolution hapoh ka ïïng dorbar, u Executive Member (EM) ka tnad u Bah Pynkhrawboklin Kharjahrin u la pynpaw ba ka jingsiew ïa ka jingïoh jingbit ban shna ïïng kaba mynta ka long ka jingkit kaba khia ïa kiba duk.
U Bah Pynkhrawboklin u la pynshai ba ka Executive Committee (EC) ka la rai ban nym shim ïa ka bai jingbit ban tei ïa ki longïïng kiba duna ka ïoh ka kot khamtam ïa kito kiba don ki jaka kiba rit.
“Ka EC ka thmu ruh ban pyntip paidbah ïa ka rukom siew bai lutksan, khnang ba ki briew kin tip katno ki donkam ban siew na ka bynta ka jingbit ban tei, katkum ka jingheh jong ka jaka jong ki. Kum ka nuksa, ka dor ka long naduh 2tyngka shi phut na ka bynta ka jaka kaba hapoh 500 sqft haduh 3tyngka shi phut na ka bynta ka jaka kaba hapoh 1000 sqft,” u la ong.
Nangta u EM u la bynrap ba ka EC kan phah ruh ïa ki Engineer sha ki longïing kiba duna ka ïoh ka kot, khnang ba kin lait na kaba siew ïa ka bai Engineer. Kane ka jingleh la khmih lynti ba kan pynsuk ïa ka rukom ïoh jingbit ban tei, khamtam ïa kito ki bym lah ban siew.
Hynrei na ka liang u Nongïalam ka Liangpyrshah u Bah Titos Chyne u la ai jingmut ba ha ka jaka ban wanrah da ka Resolution ka EC ka dei ban thoh sha ka sorkar jylla ban pynkylla noh ïa ka Building Bylaws.
Shuh shuh u la kdew ba ka sorkar ka la dep ban ai bor ia ka District Council ban pyntreikam ïa ka Building Permit hapoh ka Master Plan Area, bad ba ka jingthoh sha ka sorkar kan long ka lad kaba kham paka ban sdang ïa ki jingïakren halor ka jingpynkylla ïa ki bylaws.