Dawa ka JSU ïa ka DHS ban pynbeit thymmai ïa ka thup ki samla pule MBBS ha ka open category

Shillong, Risaw 03: Ka Jaiñtia Students’ Union (JSU) ka la dawa ïa ka Directorate of Health Services (DHS) ban pynbeit thymmai ïa ka thup bhah kyrteng nalor ban pynkynriah ïa kiba ïakhun na ki Khasi bad Jaiñtia sha ka open category merit list, khlem da pynkylla ïa ki jaka pule kiba mynta kiba la bhah hapoh ki 7 sngi.
Kane ka la wan hadien ka jingkynnoh jong ka jingbym biang ka jingbhah ïa ka thup kyrteng (merit list) na ka bynta ban ïoh rung pule MBBS hapoh ka central pool quota.
Ha ka jingujor ba la aiti sha ka ophis DHS ha ka sngi Thohdieng, ka JSU ka la kam ba ki samla kiba la tbit bad kiba shemphang kiba dei ki Khasi bad Jaiñtia ki la shah kyntait ban ïoh ïa ki jaka kiba dei hok jong ki ha ka Open Category wat ba ki ïoh ïa ki marks kiba heh ha ka NEET ban ïa katto katne kiwei pat kiba ïakhun kiba la shah jied.
Ka union ka la lap ruh ïa ki jingbakla kiba thikna haba pynmih ïa ki thup kyrteng, kynthup ïa ka jingbuh ïa ka thup jong ki kyrtong kiba ïoh duna ki marks ha ka Open Category halor ka thup kyrteng ha ka jaka jong ki samla Khasi bad Jaiñtia kiba ïoh heh marks.
Ka union ka la kdew ruh ïa ki katto katne ki nuksa ha kaba ki samla pule kiba shemphang kiba dei na ki kynhun ki Khasi bad Jaiñtia ki la shah leh lyndet da kaba noh shilliang pynban sha ki kyrtong kiba duna ka jingshem phang ba kin ïoh rung hapoh ka thup ka Open Category.
Kawei na ki kyrtong kaba dei na ka thup kynhun Khasi bad Jaiñtia Rikor Nongkynrih ba la ïoh marks ba heh ha ka NEET da kaba score 475 ka la buh ka kyrteng hapoh thup kaba shapoh ha ka kyrtong ka Open Category ka Diya Ghosh kaba la score duna kata 472, ka la ong da kaba bynrap ruh ba ka kyrtong na ka kynhun Khasi Jaiñtia kaba la ïoh ïa ka kyrdan kaba 7th ka Suwandaka Wann kaba la ïoh ïa ka marks kaba heh ha ka NEET da 443 ka la shah buh shapoh ka kyrdan jong ka Open Category ban ïa ka Tanushka Chakravorty kaba ïoh duna ka score da 442.
Ka JSU ka la kynnoh ba samla na ka kynhun jaitbynriew Khasi bad Jaiñtia Amebaaihunsha Kharbhih ba la ïoh ïa ka marks kaba heh ha ka NEET da 445 la ïoh ka bhah pule ha RIMS, Imphal, katba ka Open Category candidate ka Tanushka Chakravorty kaba la ïoh ka score kaba duna da 442 ka la ïoh lang ïa ka bhah pule ha kajuh ka jaka pule.
Katkum ka union, kane ym dei tang ba ka pynkheiñ ïa ki rukom treikam jong ka aiñ hynrei ka la pynduh ïa ka hok ki samla pule kiba dei ban ïoh ki lad ban kyntiew ïa ki jingpule jong ki sha ki kyrdan kiba janai.
“Kumta ngi dawa ban pynkynriah noh ïa ki 8 ngut ki samla Khasi & Jaiñtia ba kynthup ïa Rikor Nongkynrih ba ïoh marks da 475, Niki Arrisa Shylla da 468, Rapmi Toi da 467, Bryan Lionel Nongsiej da 463, Phibankyntiew Kharkongor da 449, Amebaaihunsha Kharbhih da 445, Suwandaka Wann da 443, bad Eleazer Vincent Lyngdoh da 442, ha kaba baroh ki la kynjoh ne ki la tam ïa ka kyrdan jong ki samla kiba la biang ka jingnang jingtip na ka bynta ban pyrkhat ban kynthup ha ka Open Category merit list, bad ba kane kan treikam noh mardor. Dei ruh ban pynthikna ba kam dei ban don ka jingpynkylla ïa ki jaka pule ba la dep bhah ïa ki kum ka RIMS Imphal, Lady Hardinge MC ha kane ka por ba pynkynriah ïa ki,” ong ka JSU ha ka jingujor.
Ka union ka la dawa ban pyndonkam ïa ki seat kiba la buh kum ka bhah kyrpang ban ailad pyndap ïa ki kyrtong kiba na ka jaitbynriew Khasi & Jaiñtia kiba don ha ka waiting list, naba kane kan ïarap bad ai ki jingmyntoi ïa ki.
“Sngewbha shim ïa kane ka kam kum kaba donkam ban leh noh kyrkieh na ka daw jong ka jingbuh ïa ka por ban pynlong ïa kane ka jingïakhun na ka bynta ban ïoh ïa ka seat bad ka bond agreement kaba dei mynta ka 3 tarik Risaw, 2025. Dei ban pynmih ïa ka corrigendum bad ban pynmih ne thep noh ïa ka thup kyrteng kaba la dep ban bishar biang hapoh ka meghealth.gov.in kham kloi katba lah bad ba dei ruh ban jubab ïa kane ka jingjujor hapoh ki 7 sngi,” ka la bynrap.