Dawa ka JSU bad ka Synjuk Waheh Chnong Jowai ban plie noh ïa ka B.Ed College ha Jowai

Jowai, Nailar 01: Ka Joint Action Committee (JAC) ba lah pynlong mynta ka sngi hapdeng ka Jaiñtia Student Uniom (JSU) seng kmie ha ryngkat bad ka Synjuk Waheh Chnong Jowai ki lah shong ïaka jingïalang ha sor Jowai ha ka jingïadon lang ki nongïalam ka SWCJ naduh u President ma Alan Niangti, u General Secretary ka SWCJ u Waheh Riquoma Rq Laloo bad ki dkhot ka EC SWCJ bad na ka liang ka JSU lah don u General Secretary u samla Treibor R Suchen bad u Education Secretaru u samla Eddy K Pohtam bad ki dkhot ka seng kmie.
Ha kane ka jingïalang la mih ka rai ban pan jingshai na ka sorkar jylla na bynta ka jingpynslem ka sorkar ban plie noh ïaka B.Ed College ha Jowai bad ka JAC ka dawa ruh na ka sorkar ba ka dei ban plie noh ïakane ka B.Ed College namar ïaka building ban pynlong ïaki klas ruh ka sorkar ka lah dep ban shna kyrpang kaba don ha Mynthong Jowai ka JAC ka la pynsngew ruh wat ïaki nongtrei ban trei ha kane ka College ruh la dep ban thung kam ïaki hynrei ka College pat kam don satia.
Na ka liang u General Secretary ka seng JSU u samla Treibor R Suchen u ong ba ka JSU ka la dep ban dawa ïaka B.Ed College ha Jaiñtia naduh u snem 1987 haka por ba long President u ma Garland Rymbai bad u R. Swer kum u General Secretary bad u la ong ba ka sorkar jylla ka dei ban pynkloi ban pan noh ïaka jingithuh ïaka B.Ed College ha Jowai na ka NCTE na Delhi ban ïoh plie noh kloi ïa kane ka college namar ïa mynta kane ka building jong ka B.Ed College lah pynlong pynban daka Higher Secondary School jong Ka Kiang Nangbah College shipor kat ym pat plie ïaka B.Ed College hapoh kane ka building kaba don ha Jowai Mynthong.
U samla Suchen u la ong ruh ba sorkar jylla kam dei ban leh shiliang ïaka ri Jaiñtia namar ka seng la 35 tylli ki snem ka la dawa ban plie ka B.Ed College ha Jaiñtia hynrei ka sorkar bad ki nongmih khmat kim shim khia bad u ong ba dang shen ha Tura ka lah plie ïa la ka jong ka B.Ed Collge bad kane lah pynbna hi da u Myntri Rangbah ka Jylla u Conrad Sangma.
Na ka liang ki nongïalam jong ka Synuk ki Waheh Chnong Jowai ki la ong ba ka sorkar ka dei ban plie noh ïa kane ka jaka pule ban ïoh jingmyntoi ki khynnah pule ka thaiñ khamtam ba dang duna ki jaka pule B.Ed hapoh ka jylla bad ki lah ong ruh ba kane ka JAC kin sa phah da ka shithi sha u Myntri Rangbah ka jylla bad sha u Myntri ka pule puthi ban dawa ban plie noh mardor ïakane ka jaka pule kaba lah sah teng lah bun tylli ki snem mynta.