Dawa ka JSM naka sorkar ban sangeh ka jingpynkynriah kam ïaki ophisar ha Ri-Lum Jaiñtia

Jowai, Nailar 02: Ka Jaiñtia Student’s Movement (JSM) sengkmie kala pynpaw ka jingsngewkhia shi katdei eh halor ka jingpynkynriah kam ba khah khah ka sorkar MDA ïaki Ophisar ha ki tnad sorkar bapher hapoh ka Ri-Lum Jaiñtia.
Ka seng ka ong dang shen lalap baki katto katne ki ophisar kiba dang shu join tang hynriew bnai ne katto katne bnai ki shah pynkynriah kam bad kane ka ktah ïa u babun balang khamtam ki paidbah kiba leit donkam sha kitei ki ophis sorkar bapher bapher.
Halor kane ka seng kala pyntip ba ka don ka jingsuba jur ba dei ka kam saiñhima sima (Politics) da kaba wan rah dala u jong u briew tang naka bynta ka jingmyntoi ha ka Election ka ban sa wan.
Na ka liang ka seng ka dawa naka sorkar ban sangeh mardor ïa kane ka jingleh kam Politics, khnang ba ki kam jong u paitbah ba bun ba lang kin ym thud shuh nang ne shakhmat ha baroh ki tnad sorkar hapoh ka Ri-Lum Jaiñtia, pynkut ka kyrwoh na u bah P. S. Phawa Chief Organising Secretary JSM Central Body.