Dawa ka JSM ïa ka NHAI ban pynkhuid ki lynti ïaid kjat shi lynter ka surok NH-6, EJH

Khliehriat Lber 22: Ka Jaiñtia Students Movement Eastern Region hynnin ka sngi ka la leit ban buh da ka jingthoh hakhmat u Deputy Commissioner ka East Jaiñtia Hills District ha kaba ka la pynpaw ka jingsngew khia halor ka jingbyn bit bym biang, ka jingbym khuid ki lynti iaid kjat kiba naduh Tuber Sohshrieh ter ter shaduh Ratacherra, halor kane ka seng ka kyntu ruh ba donkam ban da pynkhuid bha ruh ïa ki jaboh, ki jakhlia, ki ñiut ha ki lynti iaid kjat (Footpath) khnang ban pynsuk ïa ki briew kiba ïaid da ka kjat.
Katkum ka shithi ba la buh hakhmat u Depury Commissioner ba la soi da u President JSM-ER, u bah Wellson RD Siangshai bad u Vice President, u bah Donkupar Roy Kharkrang, ka seng ka la ong ba kumba long mynta ki jaka iaid kjat ne ki footpath ha shi lynter ha surok national highway ha East Jaiñtia Hills District khamtam ha Wapungskur, ha Mookhep, Ladrymbai bad ha kiwei kiwei ki jaka, ki lynti iaid kjat ki la dap da ki jaboh, ki jakhlia, ki ñiut bad khamtam eh ha Wapung (Moopynieiñ) bad ha ïew Ladrymbai donkam ban pynkhuid bha khnang ba ki briew kin ioh ban iaid na kine ki lynti iaid kjat ban nym buh jingma ïa kiba iaid ba ieng bad kine ki lynti iaid kjat ki ju iaid bha ki khynnah skul, ki paidbah ruh kumjuh hynrei lada ki lynti iaid kjat ki dap da ki jaboh, ki dieng ki siej kiba kah lynti bad ki ñiut te kiba iaid kjat kim banse ban iaid na surok bah ba buh jingma, kumta ka seng ka ong ba donkam ban pynkhuid bha man ka por ïa ki lynti ïaid kjat.
Halor kane, na ka liang ka seng ka kyrpad ïa u Deputy Commissioner ba un bthah lem ïa ka NHAI ba kan shim khia noh mardor ban pynkhuid bha ïa ki lynti iaid kjat bad ong ruh ba da ka jingtuklar lang u Deputy Commissioner kan wanrah jingmyntoi ïa ki paidbah ha ki shnong ki thaw bad kin ioh ban iaid lynti na ki lynti iaid kjat bad lait na kiba bun ki jingma bad jingmynsaw.