Jowai, Rymphang 24: Ka Jaiñtia Students’ Movement (JSM) ka la aiti da ka Memorandum sha u Myntri Rangbah ka jylla lyngba u Deputy Commissioner – DC East Jaiñtia Hills District ha kane ka 24/02/2026.
Ka Jaiñtia Students’ Movement (JSM) ka la dawa ban thung da ka High Level Inquiry halor ka jingbym don u Medical & Health Officer ha CHC Mawïong, Shillong, ha ka janmiet jong ka 19 tarik u Rymphang 2026, ha ka por ba pynkit ïa i (Late) Dr. Ricky A. J. Syngkon, MP Shillong, sha katei ka jaka sumar.
Katkum ka jingïoh jingtip jong ka seng lyngba ki tyllong khubor kiba shaniah, la ong ba ha kata ka por ym shym la don u Doctor ha katei ka CHC.
Ka seng ka la pynpaw ba lada kum kane ka jingjia ka lah ban jia ïa u briew uba don kyrdan kum u MP, ka long kaba sngewkhia bha ban pyrkhat kumno pat ïa ki paidbah kiba leit wad jingïarap ha ki jaka sumar sorkar.
Ka JSM ka kyrpad ïa ka Sorkar jylla ban thung da ka jingïatohkit kaba kyrpang ban lap ïa ka jingbym don Doctor ka dei tang ha kata ka sngi ne ka dei ka rukom kaba ju jia man ka sngi, khamtam hadien 5 ne 6 baje janmiet.
Shuh shuh, ka seng ka ong ba ka jingbym don ki Medical & Health Officer ha ki PHC bad CHC bapher bapher ka jylla ka dei ka jingeh kaba jujia. Kumta ka JSM ka la dawa na ka Sorkar ba kan bthah ïa ki District Administration ban leh surprise checking ha baroh ki CHC bad PHC ha man la ki Block bad District ha ka jylla Meghalaya, khamtam ha ka por mynmiet, ban pynthikna ba ki Doctor bad ki nongtrei ka koit ka khiah ki don ha ka kamram.
Ka seng ka la ong ruh ba la ïoh bun ki jingujor na ki paidbah halor ka jingbym don ki Doctor ha ki jaka sumar sorkar.
Ha kajuh ka por ka JSM ka la buh jingkylli ruh halor ka jingphah ïa ki Nurse jong ka jylla sha Japan, Singapore bad kiwei ki Ri ban leit trei, katba ka Sorkar hi ka la mynjur ba don ka jingduna Nurse ha ki Hospital sorkar.
Ka seng ka la kyntu ïa ka Sorkar ban pynmih paidbah ïa ka kaiphod halor kine ki mat khnang ba ki paidbah kin tip bad ïoh jingshai halor kane ka kam.
