Jowai, Lber 24: Ka Jaiñtia Students’ Movement (JSM) Western Region ka la phah syndon da ka jingthoh sha u Myntri ka tnad pule puthi ka sorkar jylla u Rakkam A. Sangma lyngba ka ophis u Deputy Commissioner, halor ka nongrim ban dawa buh biang ïa ka Exam Centre CUET ha Jowai.
Halor kane ka JSM ka kwah ban buddien biang ïa kane ka kam naduh ka 18/01/2024 ban dawa na ka sorkar ban don ïa ka Exam Centre ha Jowai na ka bynta ka Exam CUET (UG) bad ïa kiwei pat ki Central Examination.
Kane ka Centre ban ïakhun ïa ka Exam CUET (UG) na ka bynta ban ïoh leit pule Bachelor Degree ha ki College Sorkar bad kiba ïasoh bad ka NEHU, kan pynsuk ïa ki samla na ki thaiñ nongkyndong da kaba kim donkam shuh ban leit ïakhun shaduh Shillong.
Shuh shuh ka seng ka ong ka jingdon ka Exam Center ha Jowai kan ïarap ïa ki samla pule ban ïoh ïakhun ïa ka exam NEET, CUET (UG) kumba long ha u snem 2024.
Ka seng ha ka jingïakren bad u Deputy Commissioner ka West Jaiñtia ula kular ban shim khia ïa kane ka jingdawa ban pynïoh biang ïa kane ka Centre Exam ha Jowai, khnang ba ki samla napoh Jaiñtia kin ïoh lad ban thoh Exam ha Jowai. Ïa kane ka shithi ka seng ka la phah lang sha ka National Testing Agency (NTA) bad sha u Director of School Education and Literacy, Meghalaya.
