Dawa ka JNC-KC na u DC ban ym shah ïaid kali heh ha ka por leit bad wai skul ha Khliehriat

Khliehriat, Jymmang 22: Ka Jaiñtia National Council-Khliehriat Circle ka pynpaw ka jingsngw khia kaba jur hadien ba ka la ioh pdiang ïa ka jingujor na ki kmie ki kpa jong ki khynnah skul halor ka jingeh kaba ki ïakynduh ha ka por ba ki leit buh bad shaw skul ïa la ki jong ki khun namar ka jingioh ïaid laitlan palat jong ki kali khamtam ki kali heh kaba buh jingma ym tang ïa ki khynnah skul hynrei kaba la wanrah ruh ïa ka jingdheng kali kaba jur bha kaba neh da ki bun bun kynta ha ka thaiñ Khliehriat.
Kumta ka Seng mynta ka sngi 22 tarik hapoh ka jingïalam u General Secretary u bah Symboh Baiar Sumer ka la leit iakynduh ïa u Deputy Commissioner ka East Jaiñtia Hills hapoh ka ophis treikam jong u ban pynsngew ïa kane ka jingeh kaba ki khynnah skul ki iakynduh man la ka sngi namar ka jinghap ban jam lyngba sha shilliang ka surok bah NH-6 ban poi sha la ki jong ki skul, khamtam ïa ki skul ba don ha Khliehriat khamtam mynta lei lei ba dang shna ïa ka surok NH 6 ha Khliehriat ka jingdheng kali ruh ka jur bha namar ka jingai lad ïa ki kali heh ban ïaid laitlan.
Ha kane ka jingiakynduh, ka Seng ka la ai jingmut ïa u DC ba un pyntreikam noh da ka No Entry ïa ki kali heh khamtam ha ka por ba ki khynnah ki dang leit sha ki skul jong ki kumjuh hadien ba la wai skul khnang ban pynduna ïa ka dheng kali bad ruh ban pynsuk ïa ki khynnah skul ban poi sha la ki jong ki skul khlem kano kano ka jingiakynduh jingeh bad jingma.
Na ka liang u Deputy Commissioner u la kular ban shimkhia ïa kane ka jingdawa jong ka seng bad ban pyntreikam noh da ka No Entry naduh ka por 8 haduh 9 baje mynstep kaba dei ka por leit skul jong ki khynnah bad naduh ka por 2 haduh 3 baje janmiet kaba dei ka por wai skul.
U DC u la ong ruh ba ïa kane ka No Entry na ka bynta ki kali heh yn pyntreikam noh naduh lashai ka sngi 23 tarik Jymmang