Dawa ka HYC ïa ka Sorkar MDA ban pynbna paidbah ïa ka kaiphod tohkit

Shillong, Jymmang, 27: Ka Hynñiewtrep Youths Council (HYC) ha ka sngi Thohdieng ka la dawa ïa ka Sorkar Jylla ban pynbna paidbah ïa ka kaphod tohkit halor ka jingshah siat ïap jong u Bah Cheristerfied Thangkhiew, hadien ba u Nongbishar ba la shongthait u T. Vaiphei u ladep aiti ïa ka kaiphod tohkit sha ka Sorkar Jylla dang ha ka taiew baladep.
Ha ka dorkhas ba la phah sha u Myntri Rangbah ka Jylla u Conrad K. Sangma, ka HYC ka la ong, “ngi la ïohi lyngba ki lad pathai khubor ba ka Enquiry Commission ba ladep thung ban pynlong ïa ka jingtohkit halor ka jingshah siat ïap jong u Bah Cheristerfiled Thangkhiew ka ladep bad ha kajuh ka por ladep aiti ruh ha ka ophis jong phi ban leh ïa kaba donkam katkum ki kyndon jong ka aiñ bad ban shim ïa ka rai katkum ka jingai jingmut jong ka Enquiry commission. Ngi la ïohi ruh lyngba ki lad pathai khubor ba ka jingtohkit mynta ka dang don hapoh ka jingbishar jong ka Political Department.”
“Ka HYC ka sngew ba ïa kane ka kam ym dei shuh ban dang pynslem shuh shuh. Namarkata, ngi dawa ba ïa ka kaiphod dei ban aiti sha ki bahaing hasem jong uba la khladnoh bad ba dei ruh ban pyndep kham kloi ïa baroh ki kyndon treikam bad ïa ka kaiphod tohkit dei ban pynbna paidbah,” la dawa ka HYC ha ka shithi ba la phah sha u Myntri Rangabh ba la soi da u President u Robert June Kharjahrin bad u General Secretary u Bah Roy Kupar Synrem.
“Ngi ngeit ba ka Enquiry Commission ka la kdew ïa ki kyrteng jong kiba donkti ha kaba pynïap ïa u (Bah Cheristerfielf Thangkiew) bad ban pynshitom ruh ïa baroh kiba donkti ban leh ïa kane ka kam runar bad ba dei ruh ban kem mardor ïa ki lane ban pynngat hapoh ki kyndon aiñ kiba eh bad lada ki dei ki shakri Sorkar (Pulit) dei ban sospon mardor ïa ki na ka kam,” la dawa ka Seng.
Ka Seng ka la byrngem ban pynlong da ka jingïakhih pyrshah ïa ka Sorkar lada kam sngap ïa ka jingdawa.