Shillong, Nailur, 22: Ka Hynñiewtrep Youth Council (HYC) ha ka sngi Palei ka la dawa ïa ka Sorkar Jylla ban ai tohkit ha ka Central Bureau of investigation (CBI) halor ka jingshah siat ïap jong u nongïalam barim ka seng kieng atiar Hynñiewtrep National Liberation Council (HNLC) u Bah Cheristerfield Thangkhiew khnang ban pynthikna ïa ka jingpynshitom ïa kiba donkti ha kane ka kam bymman.
“Ngi dawa ba dei ban tohkit halor ka jingïap u Bah Cheris da ka Independent Investigating Agency, ym da ka tnat Pulit ka Jylla Meghalaya, bad lada ka jingtohkit ka la sdang, dei ban aiti ïa kane ka kam sha ka CBI ban nang tohkit bniah na ka bynta ban pynshitom ïa kiba donkti ha kane ka kam runar kaba lam shaduh u pud ka jingduhei u Bah Cheris ïa ka jingim,” dawa ka HYC ha ka dorkhas ba la phah sha u Myntri Rangbah ka Jylla u Conrad K. Sangma.
Ka HYC ka la kynnoh ba ka Sorkar Jylla ka la thaw ïa ka One Man Commission of Inquiry ba la khlieh da u Justice T. Vaiphei tang ban shu pynhun ïa ki paidbah jong ka jylla hadien ba ka la mih ka jingbitar halor ka jingshah siat ïap jong u Bah Cheris ha ka step phyrngab jong ka 13 tarik Nailur, 2021.
Ka Commission hadien khyndai bnai khatduh ïawai ka la aiti ïa ki jingshem jong ka sha ka Sorkar Jylla.
Ha ka kaiphod, ka Commission ka la ai ïa ka jingkynthoh da kaba ong, “ka jingkhynra ka dei kaba la pynkhreh bha, hynrei kaba shu leh kyrkieh, khlem da pyndonkam bha ïa ka bor pyrkhat pyrdaiñ. Ha kawei pat ka kyntien, ka dei pynban ka jingkhynra ba shu leh lymmuh.
Ka Commisson ka la kdew ruh ba ka jingkhynra jong ki Pulit ka dei kaba la pyndonkam palat pud ïa ka bor da ka Tactical Team-I kaba leit sha iing sah u Bah Cheris tang ban khynra bad ban kem im ïa u ym ban siat ïap.
Ka HYC ka ong ba ka jinglap jong ka jingtohkit ka long kaba shai bha ba ki dkhot ka Tactical Team-I ki dei ka daw kaba lam sha ka jingïap jong u Bah Cherist bad namarkata dei ban tohkit ruh halor kane bad ban tian bishar bad pynsajia ïa kiba don bynta ha kane ka kam bymman katkum ka aiñ.
“Ka long kaei kaei kaba pynkyndih ban ïohi ba ka Sorkar Jylla ha ka jaka ban pule bniah bad ban leh eiei halor ka jinglap ba la kdew ha ka Para 34 jong ka kaiphod ka Commission, hynrei ka la pyrshang ban pynslem ïa kane ka kam lane ka la pyrshang ban ïada ïa kito kiba donkti ha ka jingkhynra lymmuh da kaba ong pynban ba kan sa pan jingpynshai na ka Tactical Team-I katkum ka Memorandum of Action ba la kdew ha ka kaiphod tohkit,” la ong ka Seng.
Ka seng ka la ong ruh ba Commission ka la ai jingkynthoh ha ka Para 32, ‘lada ka jingthmu jong ka jingkhynra ka long tang ban shu kem im ïa u Bah Cheris, hynrei ka rukom leit khynra ka long ka bym i donkam ban poi haduh une u pud. Kane ka long kaei kaei kaba sngewsih. “Kane ka ka jingkynthoh jong ka Commission ha ka jingsngew jong ngi ka pynlong ïa ngi ban pyrkhat sani halor ki jingshisha ba ka lah ban don ka jingïasylla ban pynïap ïa u Bah Cheris bad ym ban shu kem im bad ngi sngew ba ka long kaba donkam ban tohkit bniah halor kane la ka don neem ka jingïasylla kam bymman bad ban pynshitom ïa baroh kiba donkti katkum ka aiñ,” la ong ka Seng ha ka dorkhas sha u Myntri Rangbah.
