SHILLONG, Risaw 04: Ka Hynniewtrep Youth Council (HYC) ha ka Sngi Thohdieng (04 tarik Risaw) ka la pynpaw ïa ka jingpyrshah kaba jur halor ka jingpynrung ïa ki briew ba nabar ban mihkhmat ïa ka jylla Meghalaya kum ki rangïalehkai ka kynhun ka ban ïakhun ha ka All India Under-23 Col C.K. Nayudu Trophy na bynta ka samoi 2024-2025 bad ruh ha ka All India Senior Men Ranji Trophy.
Ha ka shithi ba la phah sha u President ka Meghalaya Cricket Association (MCA), u President ka HYC u Bah Roykupar Synrem u la ong, “Ngi dawa ba dei ban weng noh ïa ki kyrteng (jong kum kine) ki briew (ba nabar jylla) na ka thup kyrteng bad ha jaka jong ki dei ban jied ïa ki nongïalehkai kiba dei hok jong ka jylla”
U la kynnoh ba u Kevin S Christopher, Abhishek Kumar, P.M. Santosh, Sachin Kumar, Rohit Kr Yadav bad u Raghav Magotra, kiba la shah jied ban mihkhmat ïa ka jylla Meghalaya ha ka All India Under-23 Col C.K. Nayudu Trophy na bynta ka samoi 2024-2025, katkum ka jingtip la ong ba kim dei satia ki nongshong shnong ka jylla Meghalaya hynrei ki la shah jied pat kum ki rangïalehkai trai jylla.
Related Posts
Kumjuh, u Arpit Bhatewara bad u Jaskirat Singh Sachdeva kiba la shah jied ban mihkhmat ïa ka Meghalaya ha ka All India Senior Men Ranji Trophy, kim dei satia ki trai nongshong shnong ka jylla Meghalaya hynrei la jied pat ïa ki kum ki rangïalehkai trai jylla,” la bynrap u Bah Roykupar Synrem.
Ka jingjied ïa ki briew ba la kdew haneng ban mihkhmat ïa ka Meghalaya watla kim dei satia ki trai nongshong shnong ka long kaba pyrshah jur na ka liang jong Ngi. Kane ka jingleh jong ka MCA ban ai jingmyntoi ïa ki briew kiba nabar ka long ka jingduhnong ïa ki nongïalehkai kiba dei hok bad kiba don sap na kane ka thaiñ bad ym satia ban pdiang bad dei ban pynrem jur.
Ka long ka jingshisha ba kine ki briew kiba nabar ki la shimkhia kynsan kynsan ban mihkhmat ïa ka Meghalaya tang hadien ba ka MCA ka la ïoh ban pynïasoh ban long dkhot ba pura jong ka BCCI ha u snem 2017-2018. Dei ki rangïalehkai trai jylla shuwa u snem 2017-2018 kiba la lehkai bad trei shitom khnang ban buh ïa ka Meghalaya ha ka jingïalehkai ha ka kyrdan ba ka don mynta,” u la pynpaw ha kane ka shithi.