Nongstoiñ, Nailar, 06 : Namar ka jingpynslem jong ka Joint Stock Company-TIER kaba pyntrei ïa ka surok Intermediate Lane Nongstoiñ – Wahkaji ban plie ïa ka jingkieng ha ka wah Kynshi kaba pynïasoh ïa ka shnong Mawthyngkper bad Nongkynjang ki nongïalam ka Hynñiewtrep Youth Council (HYC) Lai Lyngdoh Circle ba la synran lang da ki nongñiah trok ha ka sngi Baar ki la leit ban ïakynduh ïa u Project Manager uba peit ïa kane ka jingtrei bad ki la dawa ba un pyndep noh kloi katba lah.
Ha u kyrwoh ba la soi da u President u samla Wandap Marweiñ, la ong ba ka jingdawa jong ka seng ïa ka Kompeni ba kan plie noh ïa ka jingkieng ka long namarba ki kali heh kiba kit ïa ki mar ki mata ban leit sha Mawkyrwat, Rangblang, Umdohlun, Wahkaji bad kiwei kiwei ki jaka ha ki thaiñ Warsanlyngdoh ki shem shitom haduh katta katta namarba kim don satia ki surok kiba kham jan bad haba ki kit ïa ki mar na Nongstoiñ ki hap ban kiew haduh Nongshyllong sha Parïong-Jashiar bad hiar arsut sha ki thaiñ Rangbalang ter ter haduh Wahkaji.
La ong ruh ba ka surok ka long kaba jngai bad namarba ka la ktah ïa ka bai kit bai bah ki mar ki mata ki kiew dor bad ka la buh jingeh ïa ki paitbah.
Ha u kyrwoh, ka seng ka la buh por ba ka Kompeni ka dei ban plie noh ïa ka jingkieng ha shuwa ka sngi Thohdieng ban wan kata ha ka 22 tarik mynta u bnai hynrei lym kumta ka seng kam banse ban shim da kiwei pat ki sienjam.
