Shillong, Jymmang 13: Ka Hynñiewtrep Youth Council (HYC) ka dawa ïa ka sorkar ban kan pyntreikam pura ïa ka Meghalaya State Sports Policy 2019 bad kumjuh ruh ïa ka Meghalaya State Youth Policy 2021.
Ka HYC hapoh ka jingïalam u Bah Robertjune Kharjahrin President ka seng ha ka sngi Thohdieng kala leit ban ïakynduh ïa u Myntri ka tnad ïalehkai Bah Banteidor Lyngdoh bad aiti ïa ka dorkhas halor kitei ki ar tylli ki mat jingdawa.
“Ka HYC ka ai khublei shi katdei eh ïa ka sorkar jylla kaba trei shitom ban kyntiew ïa ki jingïalehkai bad ïa ki nongïalehkai bad ruh na bynta ka roi ka par sha ki samla da kaba thaw da ka Meghalaya State Sports Policy 2019 bad Meghalaya State Youth Policy 2021,” ong u Bah Kharjahrin.
“Ka HYC ka kyrmen skhem ba ka Meghalaya State Sports Policy 2019 kaba la pynkha da ka sorkar jylla kan kyntiew ïa ki kam ïalehkai bad kan ïarap ruh na bynta ki nongïalehkai hapoh ka jylla. Hynrei ngi lyngngoh ban ïohi ba ïa ka Meghalaya State Sports Policy kaba la pynmih ha ka 10 tarik Jylliew 2019 haduh mynta ym pat shym la pyntreikam satia. Ngi dap da ka jingsngewkhia halor kane ka jingpynslem ban pyntreikam ïa kane ka policy kaba long ka jingpynduh mynsiem na bynta ki nongïalehkai,” la ong u Bah Robertjune.
Ka HYC kala pynpaw ruh ba ïa ka Meghalaya State Youth Policy 2021 la pynbna ha ka 1 tarik Nailur 2021 hynrei ïa kane ruh haduh mynta mynne ka sorkar kam pat shym la pyntreikam.
Kumta ka seng ka dawa jur ba ka sorkar kan pyntreikam pura noh ïa ka Meghalaya State Sports Policy 2019 bad ruh ïa ka Meghalaya State Youth Policy 2021.
