Nongstoiñ, Ïaïong, 21: Ka jingshah pynkynriah kam khlem nongrim jong kawei ka nonghikai jong ka Tynghor Government Lower Primary school naduh u snem 2020, kala pynlong ïa ki nongïalam ka Hynñiewtrep Youth Council Rimuliang circle, ba kin mih shakhmat ban dawa na ka sorkar ba ka dei ban phah noh kloi kloi ïa ka nonghikai ha katei ka skul namar ka la ktah haduh katta katta ïa ki khynnah.
U samla Distarborlin Wanñiang President ka HYC haba ïakren ban ki nongthoh khubor, u la ïathuh ba hadien ba ka sorkar ka la pynkynriah kam ïa ka nonghikai jong ka Tynghor Govt L.P skul, ki sobjek ba katei ka nonghikai ka ju shim ïa ki khynnah ka la shu duh ei. Kumta ki kmie ki kpa jong ki khynnah ki la kyrpad ïa ki nongïalam ka seng ba kin tuklar lem halor katei ka kam.
U la ong ruh ba hadien ba kila ïoh ïa katei ka jingkyrpad ki la leit ban pan jingshai na u Sub Divisional of School Education Officer jong ka West Khasi Hills. Lyngba ki kot ki sla ba ki la ïoh na katei ka ophis, la lap ba hadien ba la dep pynkynriah ïa katei ka jingweng, la thung da kawei pat ha ka jaka jong ka.
Hynrei, naduh ba ka sorkar ka la thung ïa ka nonghikai ba thymmai ha u bnai ba ar jong u snem 2021, ym shym la wan shimti satia ïa ka kam haduh kine ki sngi. Ka jingbym wan shimti jong katei ka nonghikai ïa ka kam, ka la pynlong ïa ki khynnah ba kin duh ban ïaleh exam ïa ki sobjek ba katei ka nonghikai ka shim.
Utei u nongïalam ka seng u la ong ruh ba kaba lyngngoh ka long ba katkum ki kot ki sla, la lap ba ym dei tang ka Tynghor Government L.P skul kaba ki nonghikai ki shah pynkyn
riah kam, hynrei ki don bun kiwei pat ki Government L.P kiba ngat ha kajuh ka rukom.
Nalor kata u la ong ruh ba hadien ba ki la bishar bniah, ki la lap ba ka daw ba kongsan ka dei namar ka sorkar ka shah ba uwei u nonghikai un thoh ïa ki exam ha ki Training na ka bynta ar tylli ki post kata na ka bynta ki L.P bad na ka bynta ki U.P skul. Kito kiba pass ïa baroh artylli ki leit joint tang ha kawei kumta ka wei pat ka post ka thylli noh.
Kumta ha kaba ïadei bad katei ka kam thung nonghikai bad ka jingshah ba kin thoh ar tylli ki exam ha ki training, ka seng ka dawa ïa ka sorkar ba ka dei ban pyndam noh kloi, namar ka ktah haduh katta katta ïa kiwei pat ki nonghikai bad ïa ki khynnah skul.
Utei u nongïakam ka seng u la ong ba na ka bynta jong ka jingbym wan shimti jong ka nonghikai ba la thung ha Tynghor Govt L.P skul, ka seng kan sa leit ban ïakynduh ïa u Director ban pan jingshai bad ban dawa, ba u dei ban leh ei ei ïa katei ka nonghikai kaba la pynduh ïaleh exam ïa ki khynnah ha u snem ba la dep.
Ka jingduna ki nonghikai ka la buh jingeh bha ia ki khynnah skul bad wanrah ruh ia ka jingduhnong jong ki khynnah skul ha ka pule ka puthi.
