Dawa ka HYC bad HITO ban ym shah ka sorkar ban ïaid paidbah kiba khang bam doh masi

Shillong, Nailur 13: Ka seng Hynñiewtrep Youth Council (HYC) ha ka sngi Thohdieng ka la kyntu ïa ka sorkar jylla ba kam dei ban shah ïa ka seng Gau Pratishtha Andolan: Gau Dhwaj Sthapana Bharat Yatra ban pynlong ïa ka jingïaid rally ban pyrshah bam doh Masi kaba ki la thmu ban pynlong ha ka 2 tarik u Risaw.
“Na ka bynta ka bha ka miat bad ka shongsuk shongsaiñ bad ka jingsngew shipara, ngi kwah ban ong ïa ka sorkar ba kam dei satia ban shah ban pynlong ïa ka ‘yatra’ ne ka program ba kin rung hapoh ka jylla kumba la pynbna da katei ka seng,” ong u nongïalam ka HYC u Bah Roy Kupar Synrem ha ka dorkhas ba la phah sha u Myntri Rangbah ka jylla u Conrad K Sangma ha kane ka sngi.
U la ong ba ka jingbam ïa ka doh Masi ka dei ka jingim jong ki briew ha kane ka jylla Meghalaya nalor ba ka la ai ïa ka lad kamai kajih da kaba die bad thied ïa ka doh Masi ha ka jylla.
“Haba ngi khlem pynbor ïa kiwei pat ban bam ne ba kim dei ban bam, namar kata ngi pyrshah ïa kino kino ki bor ne kynhun kiba pynbor ïa ka jingmlien jong ki ban khang ne ban pynïaid ïa ki rukom treikam jong ki ban bam doh Masi,” u la ong da kaba bynrap, “Ka kmie ka don ïa ka jaka kaba biang tam hapoh ka imlang sahlang hapoh ka bri u Hynñiewtrep bad ban nujor ïa ki kum ka Masi ne ki ksew ka long kaba thamula ha ka imlang sahlang jong ngi. Namar kata ngi pyrshah ïa kano kano ka seng kaba pynbor ïa ngi ban pynlong ïa ka Masi kum ka kmie,” ong ka HYC. Ka Hynñiewtrep Integrated Territorial Organization (HITO) ha ka sngi Thohdieng ka la phah da ka jingthoh sha u Myntri Rangbah ka Jylla u Conrad K. Sangma ban dawa ba dei ban khanglad ïa ka Gau Dhwaj Sthapana Bharat Yatra ne ka jingïaid paidbah ban pynbna kmie ïa ka masi ha Meghalaya
Ha ka jingïakren bad ki lad pathai khubor u President ka HITO u Bah Donbok Dkhar u la ong, “ngi la phah ïa ka jingujor bad ka jingdawa sha ka Sorkar ban ym shah pynlong ïa ka Gau Dhwaj Sthapana Bharat Yatra ha ka 2 tarik, Risaw, 2024 ha nongbah Shillong. Ha ka shithi ngi la pynpaw ba kino kino ki shitniam na kano kano ka niam kim lah ban wan pynbor ne ban batai ïa kaei kaba ngim dei ban bam bad ïa kaei kaba ngi dei ban bam.”
“Ngi pynrem ïa ka jingkwah jong ki kaba sngewthamula,” ong u Bah Donbok.
Ha ka dorkhas ka seng ka la pynpaw ba kum kine ki jingleh ka long kum ka jingpyndom ïa ka jingngeit niam jong ki nongshong shnong kiba bun ki dei ki Khristan ha kane ka jylla.
“Ka doh masi ka dei ka jingbam ba manla ka sngi na ka bynta ki jaidbynriew ritpaid Hynñiewtrep bad Achik, kiba ju bam ïa kane ka doh da ki spah snem. Ka jingwanrah ïa kane ka mat ha ka thaiñ jong ngi ka tuklar ïa ka hok tynrai jong ngi ban jied bad bam ïa ki jingbam,” la ong ka HITO.
“Ngi kwah ruh ban pynpaw ba ka jingdawa ban pynbna ïa ka masi kum ka ‘Kmie jong ka Jaitbynriew’ ka ïatyngkhuh bad ka Article 18 (1) jong ka Riti Synshar ka ri India, kaba khang ban ai kyrteng da ka Jylla lait noh tang ha ka tnat Shipai ne ha ka tnat Pule,” la pynpaw ka HITO.
“Shuh shuh, kum kine ki jingdawa ki pynsniew ïa ka jinglong tynrai bad ka jingsngew niam jong ka jaitbynriew Hynñiewtrep. Lada ka Yatra kan ïaid shakhmat bad yn pynieng ïa ka lama masi ha ka khyndew ka shyiap jong ngi, ngi kum ka seng ngin mih sha surok ha kajuh ka sngi ban pynher ïa ka lama jong ki 25 tylli ki Hima bad ban dawa ïa ki hok bym shym la ai ïa ngi la palat 75 snem khamtam eh ha kaba ïadei bad ka Inner Line Permit (ILP) bad ki Autonomous District Council (ADC), kiba dang hap ban pynkup bor pura da ka Sorkar Pdeng bad ka Sorkar Jylla,” la ong ka HITO ha ka dorkhas.
“Ngi kyntu ïa phi ban leh ïa kaba donkam ban khanglad ïa kane ka Yatra ka ban sa long,” la kyntu ka HITO ïa u Myntri Rangbah.