Shillong, Nohprah 17: Ka Hills State People Democratic Party (HSPDP)-Youth Wing jong ka West Khasi Hills District ha ka sngi Balang ka la aiti ïa ka dorkhas sha u Myntri ka tnat Arts and Culture u Bah Sanbor Shullai ban dawa ban kyntiew kyrdan noh ïa ka District Library kaba don ha Nongstoiñ sha ka District Multi-Convention Centre.
Ha kaba ïadei bad kane ha ka dorkhas ka HSPDP ka pynpaw ïa ka jingdonkam ban don ka Convention Multipurpose bad ka Community Center ka ban ai ka jingshakri ha ki jingdonkam bapher bapher jong ki paidbah ka West Khasi Hills.
Ha ka dorkhas ka seng ka la ong, “Ka jingdon ka District Library, watla la tei ïa ka da ka jingthmu kaba bha, hynrei ha kine ki snem ba la dep, la ïohi ïa ka jingduna bha ha ka jingpyndonkam ïa ka namar ki jingduna ha kiba bun ki liang.”
La ong ba ka jingdawa ban kyntiew kyrdan ïa ka library kan ïarap kyntiew ïa ka Arts and Culture, ka jingïatreilang jong ki samla, ka jingpule, bad ka jingkiew ka imlang sahlang ha ka District. Kan ai jingmyntoi ïa ki samla pule, ki Artist, ki seng samla, bad ki paidbah nongshong shnong, kan long kum ka jaka pule na ka bynta ki samla ki bym don jaka pynkhreh ïa ki eksamin bapher bapher.”
Ha ka dorkhas ka HSPDP ka la ong, “Ngi kyrpad jur ïa ka jingïarap ba sbun jong phi bad ka jingleh kaba donkam ban kyntiew kyrdan ïa ka District Library kaba mynta sha ka District Multi-Convention Centre bad ki jingpyndonkam ba bun jait.”
Ka Party ka la kyrpad ïa u Myntri ban mang ïa ka pisa kaba donkam bad ka jingkyrshan na ka tnad Arts and Culture bad ban pynrung ïa kane ka projek ha ka plan na ka bynta u snem 2025-2026.
“Ngi don ka jingkyrmen ba hapoh ka jingialam ba jong phi, ia kane ka jingangnud ba la slem jong ki paidbah ka West Khasi Hills yn lah ban pynurlong,” la ong ka HSPDP.
