Nongpoh, Risaw 11: Ki nongialam ka HNYF Northern Region ki la pynpaw ia ka jingsngew-kmen kaba khraw halor ka kular u M. Hoque, Chan-cellor ka University of Science & Technology Meghalaya (USTM), uba la mynjur ïa ki jingdawa ka seng, hadien ba ki nongialam ka seng ki la leit ban pynsngew sha u halor ka jingdonkam ban iarap bad ban pyrkhat kyrpang ia ki samla Khasi kiba pule ha ki laiñ jingpule bapher bapher ha katei ka skulbah khamtam ki samla pule kiba wan naki longiing longsem kiba duk ba rangli.
Haba kren sha ki lad pathaikhubor ha Nongpoh, u Bah Alfred Malai, General Secretary ka HNYF Northern Region, ha ryngkat ka jingdon u Bah H. Lyngdoh, President, bad u Bah B. Manih, Vice-President ka HNYF Sengkmie, u la ong ba hynnin ka sngi, ki nongïalam ka seng ki la kynduh ïa u Chancellor ka USTM bad la pynpaw ïa ka jingsngewkmen kaba khraw namar u Chancellor u pdiang sngewbha ïa ki jingdawa jong ka seng ban mang kyrpang ïaki samla khasi khamtam kiba dei na Ri-Bhoi District naduh ka jingrung class haki lain bapher bapher.
Ka USTM ka long ka jaka ba don bun ki laiñ jingpule, kynthup ruh kiba kwah ban pule Doctor bad kiwei ki lain jingpule kiba iar. Kane ka long ka lad kaba khraw ïa ki samla pule Khasi na ka jylla bad ka seng ka sngewkmen ba katei ka skulbah ka la pyrkhat kyrpang ïa ki samla Khasi, khamtam ïa kiba duna ka ioh ka kot, ong u Bah Alfred Malai.
Namarkata, ka seng ka kyntu ïa ki samla pule kiba kwah ban leit pule ha ki laiñ bapher bapher, bad khamtam ïa kiba kwah ban pule Doctor, ba kin kynduh ïa ki nongïalam ka HNYF lada ki don jingeh.
