Dawa ka HNYF ïa ka sorkar ban pynsangeh noh ka thied jaka ka MID&FC ha shnong Umtham

Shillong, Nailar 18: Ka Hynñiewtrep National Youth Front (HNYF) ka la dawa na ka Sorkar Jylla ba kan pynsangeh noh ïa ka jingtyrwa ban thied jaka ka Meghalaya Industrial Development and Finance Corporation (MID&FC) lane ka Meghalaya Industrial Development Corporation (MIDC) ha ka shnong Umtham ha Ri Bhoi District.
Lyngba ka shithi ba la aiti sha u Myntri Rangbah ka jylla Conrad K Sangma, u Finance Secretary ka HNYF samla Robin Umbah ula kynnoh ba ka jingthmu ban shim ïa ka jaka kaba heh 14 akar ha ka jinglut kaba T.21 klur, kaba mut kumba T.450 shi phut (square foot), ka long kaba palat pud bad kaba ym lah pdiang.
U ïathuh ba katkum ka jingtohkit ka seng, ka dor kaba heh tam na ka bynta ka jaka ha katei ka thaiñ ka long haduh T.150 shi square feet, kaba la pynmih ïa ka jingsngewkhia kaba jur halor ka jingthmu bamsap bad ka jingpyndonkam bakla ïa ka pisa paidbah.
“Kane ka jingbym ïahab dor kaba bun shah ka pynmih ïa ka jingsngewkhia halor ka jingthmu bamsap bad ka jingpyndonkam bakla ïa ka pisa paidbah. Ngi tieng ba kane ka jingïateh ka lah ban long ka jingpyrshang kaba paw pyrthei ban shim kabu ïa ka pisa paidbah bad ngi kyrpad ïa phi ban shimkhia mardor ban tohkit ïa kane ka kam,” ong ka HNYF ha ka shithi ba la phah sha u Myntri Rangbah ka jylla.
Ka HNYF ka la ong, “Haba ïadei bad kane ngi kyrpad da ka jingsngewrit ïa ka ophis jong phi ban pynsangeh noh ïa ka jingthmu ban shim jaka da ka MID&FC/MIDC ha ka shnong Umtham bad ban pynlong ïa ka jingtohkit kaba bniah halor kane ka kam ban tip ïa ka dor jong ka.”
Ka seng ka la dawa ban leh eiei pyrshah ïa ki heh ophisar lada lap ba ki donkti haba shim rai ïa kane ka kam.