Shillong, Nohprah 2 : Ka Hynniewtrep Integrated Territorial Organisation (HITO) kala dawa ïa ka Ministry of Environment, Forest and Climate Change (MoEFCC) ba ka dei ban pynsangeh bad ban pynduh noh ïa baroh ki kam kiba ïadei bad ka jingthmu jongka Shree Cement Limited ban seng karkhana dewbilat hapoh ka shnong Daistong, East Jaintia Hills, Meghalaya.
U President ka HITO u Bah Donbok Dkhar ula ong, ba ka jingthmu jong kane ka projek ka dei ka jingma kaba la ap lypa ïa ka thaiñ kaba kynthup ïa ki jaka rep, tyllong um bad ka rukom im tynrai jong ki paidbah.
Ka seng kala pynpaw ïa ka jingsngewkhia halor ka jingpynjaboh ïa ka lyer, ka jingtan ïa ka um bad ka jingpynkylla shirta syndon ïa ki jaka rep sha ka jaka jong ka karkhana.
“Ngi ïengskhem ba kane ka projek kam long kaba ïahap satia bad ka jinglong jingman ha ka thaiñ, ka jinglong ki jaka rep jaka riang bad ka jinglong jingman ha kaba ïadei bad ka rukom im tynrai kaba naduh mynshwa jong ki paid riewlum” la ong u Bah Dkhar.
Ka HITO kala dawa ba dei ban pynduh noh ïa ka Environmental Clearance bad ban ïada ïa ki jaka rep bad ïa ka jinglong jingman jong ka sawdong sawkun jong ka shnong Daistong bad ki jaka kiba marjan.
Ula banjur ba kane ka projek ka dei ruh kaba don hajan bha bad ki shnong ki thaw kaba tang kumba 0.82-1.4 km na ka shnong Daistong ka bym long kaba ïahap satia bad ka jinglong jingman ki jaka rep jaka riang.
Ka seng ka la buh jingkylli ruh ïa ka rukom treikam jongka Single Window Agency (SWA), hapoh ka jingïalam u Myntri Rangbah ka Jylla Meghalaya, uba la ai jingbit ïa kane ka projek khlem da shimkhia ïa ka jinglong jingman ka mariang bad ïa ka kamai kajih jong ki paidbah.
“Ngi ngim pyrshah ïa ki kam kiba ïadei bad ka roi ka par. Ngi pyrshah ïa ka jingpynjot bad jingpynjulor kiba wan ha ka dur kaba rieh lyngba ka kam pynroi” la ong u Bah Dkhar bad ka byrngem ba kano kano ka jingpyrshang ban pynïaid shakhmat ïa kane ka projek kan dei kaban mad da ka jingïakhih kaba la pynkhreh bha, kaba shongaiñ bad ka jingïeng skhem jong u paid ba bun balang.
