Shillong, Naitung 11: Ka Hynñiewtrep Integrated Terrestrial Organization mynta ka sngi ka la dawa na ka sorkar ba ka dei ban thung noh da ka Third Party Audit ban peit ïa ka jingpyntrei ïa ka song pisa ba 2.5 klur shisnem kaba la mang na bynta man la uwei pa uwei u MLA lyngba ka skhim SRWP ne MLA skhim ha ka jylla namar ka jingbym sngewhun satia halor ka rukom pyntrei ïa kane ka song pisa.
U Bah Donbok Dkhar u President ka seng u la ïathuh ba ka jingdawa jong u ban thung da ka kynhun tohkit laitluid ka dei namar ba ïa ka jingpyntrei ïa kane ka skhim ym ju don satia kino kino dur kiba don ki Geo-tagging ban sakhi ba ki jingpyntreikam ïa kane ka skhim ka long kaba shisha.
U Bah Donbok u la pynpaw ruh ïa ka jingbym sngewïahap ïa ka jingbym pat lah ki san ngut ki MLA ban buh ïa ka ka jingtyrwa khnang ban ïoh pynlait noh ïa ka pisa jong ka skhim MLA sha kiba dei ïoh jingmyntoi.
Ka HITO ka ïathuh ba kat kum ka jingwad jingtip jong ka, la shem ba na ki 60 ngut ki MLA satang saw ngut ki MLA kiba ym pat shem la lah ban pynlait ïa ka pisa kaba la mang 2.5 klur bad kine ki MLA ki kynthup ïa u Bah Metbah Lyngdoh MLA ka Mairang uba dei ruh u Lamphang ka Ïingdorbar thaw aiñ ka jylla, u Bah Renikton Lyngdoh MLA ka Mawkyrwat uba dei u Myntri ka sorkar jylla, U Bah Wailadmiki Shylla MLA Jowai, Pynïaid Sing Syiem MLA Mawryngkneng.
Shuh shuh na ka liang jong u u la buh jingkylli la kane ka jingbym lah ban phah ïa ka jingtyrwa ban ïoh ïa ka mang pisa ka dei pynban ka buit ban ïoh pyndonkam ban khroh Vote da kaba pynlait ha ki khyndiat por eh shuwa ka ilekshon khnang ban ïoh pynbieit ïa ki paidbah ong ka HITO.
