Shillong, Rymphang 13: Ka Hynniewtrep Integrated Territorial Organisation (HITO) ka la dawa ïa u Chief Electoral Officer (CEO) Dr BDR Tiwari ban bishar bniah biang ïa ka Electoral Roll ka Jylla Meghalaya bad ban pyntreikam ïa ki nongrim jong ka Memorandum of Settlement Accords na ka bynta ban ithuh bad ban weng ïa ki mynder ri ba khlem ïoh jingbit na ka Electoral Roll khnang ban ïada ïa ki trai ri trai muluk jong ka Jylla.
“Ka jingeh haba ïadei bad ki nongthep vote ki bym dei nongshong shnong ka Ri India ha Meghalaya ka dei kaba hiar pateng na Assam, bad ka Sorkar India ka la dei ban pyntreikam ïa kijuh ki nongrim kumba la buh ha ka Memorandum of Settlement Accord,” ong u president ka HITO u Bah Donbok Dkhar ha ka dorkhas bala aiti sha u BDR Tiwari haba kdew ïa ka jinglong jingman jong ka histori bad ka jingdonkam ban ïada ïa ki hok jong ki trai ri trai muluk.
Haba phai sha ka dorkhas jong u snem 1985 da u Prof MN Majaw, u Bah Donbok u la ban jur ïa ka jingdonkam ban pyntreikam ïa ki nongrim jong ka Accord, da kaba pyndonkam ïa u snem 1966 kum u snem ba pynshong nongrim bad u snem 1971 kum u snem ot kyrteng, ban weng noh ïa ki briew bym dei nong shong shnong ka Ri India naka thup nongthep vote.
“Ka long kaba donkam ban bishar bniah ïa ka thup nongthep vote, ban weng noh ïa ki nongthep vote ki bym dei nong shong shnong ka Ri India, kiba paw haka thup nongthep vote” u la ong.
Haba ai jingmut sha u CEO, ka HITO ka la kyntu ïa ka jingdonkam ban shim ïa ki lad ki lynti ban ïada ïa ka rukom jied nongmihkhmat hapoh ka Meghalaya.
Ki jingai jingmut ki kynthup ïa ka jingpynduna ban pdiang ïa ka jingpynrung kyrteng, ym dei ban pynlong ïa ka Aadhaar card kum ka kot ba donkam eh ban pynshisha ïa ka jinglong trai nongshong shnong.
“Kane ka rukom ka lah ban pynsuk khlem da tip ïa ka jingpyndonkam bakla, kaba ailad ïa ki briew ki bym dei trai ri ban shah kynthup haka thup kyrteng thep Vote” u la maham.
Ka HITO ka la kyrshan ruh ban ithuh ïa ki kot ki sla jong ki Dorbar shnong, ki Syiem, ki Nokma, bad ki kot ki sla jong ki kur ki jait kum ki sakhi kiba biang haka jingpynshisha lem bad ka jaka sah kaba pura.“Kine ki kot ki sla ki ai ka jingpynshisha kaba skhem ïa ka jingïadei u briew shimet bad ka imlang sahlang” ong ka HITO.
