Shillong, Jymmang 09: Ka seng Hynñiewtrep Achik National Movement (HANM) Land Protection Cell ha ka sngi ba ar ka la dawa na ka sorkar jylla ba ka dei ban pyndam noh mardor ïa ka notification jong u snem 1951 kaba dei ka notification ba ïa ka Block I bad Block II yn aiti noh ha ka nongpynïaid jong ka Mikir Hills.
Haba kren bad ki lad pathai khubor na ka liang u Bah Lamphrang Kharbani u President ka HANM u la ong ba “Ha ka snem 1951 la seng ïa ka United Mikir and North Cachar Hills District, bad la ot ïa ka Block I bad Block II na ka Jowai Civil Subdivision bad la pyniasnoh bad ka Mikir Hills da ka order u Governor ka Assam, No. TAD/R/31/50/149, dated 13th April, 1951. La leh ïa kane ymdei namar ba kitei ki jaka ki dei ki jaka Karbi, hynrei tang na ka bynta ban suk ka jingtrei kam (administrative convenience) ha kata ka por”
Haba pynshong nongrim ha ki kot ki sla bad ki jingtip ba la ïoh na ki heh sorkar bad ki riew rangbah ba ngin ym duh ïa ka Block I bad Block II dei ban pyndam noh ïa katei ka notification namar lada im katei ka notification ngi thikna lupa ba ngin duh sa ïa ka Block I bad Block II ong shuh shuh u Bah Lamphrang.
Haba kren halor ka jingïasoi soskular sngewthuh jingmut ne MoU da ka sorkar Meghalaya bad Assam na ka liang u Bah Lamphrang u la ong ba ka dei ka jingleh kyrkieh ka sorkar tang ban ïoh myntoi bad ban ïoh nam. Ngi ïaroh ïa ka sienjam ba ka sorkar ka shim ha kaba ïadei bad ka jingpynbeit pud hynrei ka jingleh kyrkieh jong ka keiñ kaba ngim ïahap ong u Bah Lamphrang.
Haba kren halor ka jingjyllei ki biria (meme) ïa ki nongïalam saiñ pyrthei ka jylla u Bah Lamphrang u la ong ba ka long kaei kaei kaba ka seng hi kam mynjur namar ka ktah ym tang ïa ka ijot jong ki hynrei kan ktah lang ïa ka ijot jong ka jaidbynriew bad ka jylla hi baroh. “Sahngeh noh ka shna cartoon bad kynthah khlem raiñ ïa u Bah Prestone, Bah Metbah bad ïa u Ma Lahkmen namar kine ki dei ki doh ki snam jong ngi hi bad lada phi don kaei kaei kaba phim hun ïa ka rukom treikam jong ki leit kynduh markhmat namar ki long kiba la kloi ban sngap” kyntu u Bah Lamphrang.
