Dawa ka FKJGP na ka sorkar jylla ban pynlait bhah kam election ïa ki nonghikai, namar ka ktah ïa ki khynnah bad ka skul

Nongpoh, Risaw 21: Ka Federation of Khasi Jaiñtia and Garo People, Western Zone kala dawa syndon naka sorkar ba kam dei ban pynngat duty elekshon ïaki nonghikai, hynrei ban pynngat ïa kiwei ki nongtrei naki tnad sorkar bapher bapher ym ki nonghikai ha kane ka elekshon ban wan.
Kum ban pynkynmaw, ka seng FKJGP, Western Zone ha Ri Bhoi ka la shim khia ban pynpaw halor kane ka bynta ba bunsien wat ki nonghiknai ki hap ban pyndep ïa ka kamram na ka bynta ka election duty bad ha ka jylla Meghalaya ruh sa tang katto katne por kan sa don ka jingpynthymmai ïa ki Nongmihkhmat paidbah sha ka ïing Dorbar thaw aiñ ka jylla ka ban sa long ha u snem 2023 hapoh ka jylla.
Haba phah ïaka kyrwoh naka liang u Bah C Doloi, President ka FKJGP Western Zone u la ong ba kum ka seng ka dap da ka jingsngewkhia ba ki nonghikai barabor nalor ka kam kaba khia kaba ki hap ban shakri ïaki skul, ki shah pynngat ruh haka kam (duty) elekshon, kumba ka elekshon kan sa long satang katto katne bnai ha u snem ban wan.
U la ong ruh ba bun naki skul, khamtam sha ki thaiñ nongkyndong ki don tang kumba katto katne ngut ki nonghikai pynban lada ka sorkar ka pynngat kam ïaki ha kane ka elekshon ban wan, kan long ka jingktah ïa ki khynnah skul bad khamtam ïaka skul baroh kawei namar ki don ki skul kiba don tang 2 ngut 3 ngut ki nonghikai bad lada kitei ki nonghikai kin ngat duty elekshon mano ban peit bad khmih ïaka skul.
Kum ka seng, ka dawa naka sorkar ba kam dei ban pynngat duty elekshon ïa ki nonghikai ha kane ka kynti ba mynta, hynrei ban pynngat ïakiwei ki nongtrei sorkar na kiwei kiwei ki tnad treikam sorkar khamtam kiba ju wan trei shiteng sngi.