Dawa ka FKJGP-KC ïa ka tnat bor ding ban shna bha ïa ki jaka ïeng ki nong siew bill ban lait na u slap

Khliehriat Iaiong 5: Ka Federation of Khasi Jaiñtia Garo People Khliehriat Circle, ka pynpaw ka jingsngew khia halor ka jingbym bit bym biang ka jaka ba ki paidbah ki ju ieng ban siew bai bor ding ha ophis MeECL ha Moowakhu, ha kaba ki hap ban shah ïa ka sngi, shah ïa u slap bad ka lyer, kumta ka seng ka dawa na katei ka tnat ba kan sngewbha ban shna noh da ki jaka kiba biang bad ban tap da ki tnum tin ïa ki jaka ba ieng ki nong siew bai bor ding.
Kumjuh ruh, u kyrwoh na u President FKJGP Khliehriat Circle, u samla Michal Chyrmang, u pynpaw ba ki paidbah ki ju iakynduh jingeh bha ban iakynduh bad ki heh jong ka tei ka tnat bor ding ki wan wan ophis ha ka por 12 ne 1 baje bad leitphai noh ha ka por 2 baje mynsngi bad haba pyrshang ban kylli na ki nongtrei ruh ki ju ong ba ki heh ki leit sha site, kumta ka seng ka sngew khia ba kane ka jingbym lah ban iakynduh ïa ki heh jong ka tnat bor ding ha ophis ha Moowakhu ka ju buh jingeh bha ïa ki paidbah khamtam kito kiba wan na ki jaka kiba jngai ha kaba ki shu lut ksan tang ka bai leit bai wan.