Dawa ka FKJGP ïa u Myntri Rangbah ban pynurlong noh ïa ka CHC kumba u la kular

Nongstoiñ, Jylliew, 17: Ka FKJGP Maweit circle ryngkat ka Maweit unit ha ka jingïalam u bah Anthony Umiong President ka seng, ha ka 16 tarik ka la leit ban jurip ïa ka PHC ha Maweit. Ha kane ka jingjurip ka la ïoh ruh ban ïakynduh ïa u Dr M.Mazumdar u nongpynïaid katei ka jaka sumar hapoh ka thaiñ.
Ha ka jingïakynduh ka Seng ka la ai ka jingïaroh ïa ka jingtreikam bad ka trei shitom jong u Doctor, ryngkat ki staffs katei ka hospital, kat haduh ba kan ïoh khur ïa ka khusnam kum kawei naki PHC ba ïaid beit hapoh ka jylla. Kumjuh ruh u ne u Doctor u ju noh synñiang da la ka jong ka jingsiew ban pynbiang ïa ki tiar hapoh Hospital.
Tangba, ka Seng ka pynpaw ka jingsngewdiaw bad sngewkhia ïa ka jingleh meinah bad ieh shrah ka sorkar ïa katei ka jaka sumar hapoh ka thaiñ, naduh ka surok ban rung sha Hospital, ka um, ka jaka pynieng kali, ka light bad ka jingjot rathai katei ka jaka sumar. Khamtam ha ki por slap ha kaba baroh ki kamra jong katei ka PHC ki nongtrei ki hap ban kup shatri wat hapoh kamra ruh, namar ka jing jaw ka slep jong kitei ki ïing ba don ha katei ka PHC.
Kumta ka Seng ka kyntu ïa ka sorkar bad ka tnad ba dei peit khamtam ïa u myntri Rangbah u Konrad Sangma, ba u la kular ban kyntiew kyrdan sha ka CHC haka por ba u wan ha Maweit, ba ym dei ban kular tang ka ktien ban ïohnong politics.
Hynrei, ban phai khmat lem sha katei ka jaka sumar, ban pynbiang mardor ïa ki jingdonkam ba kyrkieh jong katei ka jaka sumar hapoh ka thaiñ, khnang ba ki Doctor, ki nongtrei bad ki nongpang kin ïoh ïa ka jaka sumar kaba kham bha, kum ba long lem kiwei ki jaka sumar hapoh ka jylla.