Dawa ka FKJGP ïa ka Sorkar MDA ban kyntiew kyrdan ïa ka Sawsymper Sub Centre sha ka PHC

By Mawphor Editor On Sep 3, 2022

Sawsymper, ‘Nailur 02: Ka Federation of Khasi Jaiñtia & Garo Peoples (FKJGP) jong ka Sawsymper Circle ha ka u bnai ba la dep ka pynpaw ka jingbynñiaw halor ka jingkuman jong ka Sorkar ban kyntiew kyrdan noh ïa ka Sawsymper Sub Center sha ka PHC.
Halor kane ka bynta, u President ka FKJGP jong ka Sawsymper Circle, u samla Runningstar Kharbani u la pynpaw ba na ka liang jong ki paidbah ka dong ka thaiñ la slem bah ki la angnud la slem ban ïoh noh la ka jong ka Primary Health Center (PHC).
Ka seng ka la kren pynpaw ruh ba na ka liang jong ka sorkar ka la kren ruh sha Assembly halor ka phang ban kyntiew kyrdan noh ïa ka Sawsymper Sub Center sha ka PHC hynrei kat haduh mynta ympat ïohi dak satia ba ka sorkar kan buh ïa ka mang ha kaba ïadei bad kane ka jaka sumar. Kumjuh ruh ki paidbah jong ka dong ka thaiñ ki la long ba la khreh wat ban ai ïa ki jaka puta katkum ka jingdonkam jong ka, u la ong.
Na ka liang jong ka nongtrei ha kane ka jaka sumar ne ka Nurse In-charge ruh ka la pynpaw shai ba ka Sub Centre Sawsymper ka la dei kawei na ki Sub Centre ba la heh duh bad ba bun paid bha hapoh ka Mawsynram CHC bad dei na kane ka daw ka la shem jingeh shibun ïa ki ban ai ïa ka jingshakri ba paka ïa ki paidbah namar ka jingduna jong ki nongtrei hapoh ka Sub Centre bad ruh ka jingbym biang jong ka um, ki soap-pit bad ki drainage ban pyntuid ïa ki jakhlia.
Namarkata, ka seng ka kyntu ïa ka sorkar ba kan shimkhia mardor halor kane ka bynta na ka bynta ka jingsuk jong ki paidbah namar katkum ka jingdonkam ha kaba ïadei bad ka jingdon ki nongshong shnong ka Sawsymper Sub Center ka la kot shaduh 13 hajar duna ki paidbah, kumta ka la dei hok ban ïoh ïa ka kyrdan sha ka PHC.
Ka seng kan sa ïoh ruh ban bud-dien ïa ka kane ka kam shaduh DHS bad shaduh u Myntri ba dei peit ïa ka koit ka khiah jong ka Jylla, khnang ban kin ïoh jingshai halor ka jingkuman jong ka sorkar kaba pynlong ïa ki paidbah ba mad ïa ki jingeh bad ruh ban duh ïa ki mynsiem ba kordor tang namar ka jingbym biang ka jaka sumar.