Jowai, Jylliew, 20: Ka Federation of Khasi Jaiñtia & Garo People (FKJGP) Shangpung Circle ka la dawa ïa u Assistant General Manager ka State Bank of India, Shillong ban buh ïa kawei ka mashin ATM ha ka shnong Shangpung West Jaiñtia Hills District.
Kane ka jingdawa jong ka seng ban buh ïa ka mashin ATM jong ka SBI ka long ban pynsuk ïa ki nongshong shnong ka thaiñ bad kumjuh ruh ïa ki shnong ba marjan.
Ka seng ka la pynpaw ïa ka jingeh kaba ki paidbah ki ïa kynduh na ka por sha ka por khamtam haka rukom ban leit shim pisa namar ka jingduna ki kor ATM bad la dawa mynta ban buh sa kawei ka kor ATM ha ki bynta ka Shangpung Mission ne Shangpung Pohshnong (Trekhim).
La pynsngew ruh ba ka shnong Shangpung ka long ka shnong kaba la heh bha hapoh Jaiñtia Hills bad ka jingbun briew ha kane ka shnong bad ki marjan mar kam duna ïa ka shilak ngut, nalor kata ka Shangpung ka dei kawei na ki shnong la long Commercial Center bad ka shnong ba la bun ki office sorkar jong ki tnad bapher bapher. Kumta ka shnong ka la donkam bha ban don ïa ka ATM machine, la ong u kyrwoh na u President Bah Pynbiang Chullet.
