Nongstoiñ, Jylliew 27: Ka Federation of Khasi Jaiñtia & Garo People (FKJGP) West Khasi Hills, ka la dawa ïa ka kompani saiñ nar ba la tip kum ka Shakambari Ferro Alloy Pvt. Ltd, ba kan pyllait noh mar dor ïa ka bai nong jong ki nongbylla baroh.
Ka FKJGP West Khasi Hills hapoh ka jingïalam u Vice President Bah Carryoscar Kharmuti, ka la hiar hynne ka sngi Palei sha kane ka karkhana kaba don ha Rwiang, halor ka jingïoh pdiang ïa ki jingujor na ki Nongtrei Khasi ba ki shah set ka bai bylla ha kane ka kompani.
Katkum ka jingong jong u, ki nongtrei jong kane ka karkhana, kiba dei ki Khasi, ki ju ïakynduh jingeh man ka por namar ka jingset set ka bai bylla. U ïathuh ba ki nongtrei ki ju leit ud leit nam sha ki bor khmih hynrei ym don ba pynsngap satia ïa ka jingeh jong ki.
U ong ba dei halor kane ka nongrim, ka Seng ka la hiar dalade ban ïakynduh ïa ki bor pynïaid ka kompani bad ban dawa ba kim dei ban ñion beiñ ïa ki nongtrei Khasi.
U bah Carryoscar Kharmuti u la ong ruh ba ha ka jingïakren bad u nongpynïaid jong katei ka karkhana, ka seng ka la dawa ba nangne shakhmat ka Kmpeni ka dei ban pynbun da ki nongtrei kiba dei ki trai jylla bad kiba dei napoh ka district, kata ruh katkum ki kam ba ki lah ban trei hynrei ïa ki kam kiba ki trai jylla kim lah ban trei ka seng kan ym tuklar.
Lada ka Kompeni kan wanrah da ki nongtrei nabar jylla ruh tangba ki dei ban pynbiang ïa ki kot ki sla kat kum ki kyndon ba la pyntreikam da ka sorkar. Nalor kata u la ong ruh ba ka seng ka la dawa ruh na ki nongpynïaid katei ka karkhana ba ki dei ban siew dep bad pynkhuid noh ïa ka bai trei baroh kaba dang pynsah ha ki nongtrei.
Ha kajuh ka por, kane ka Seng ka la talasi ruh ïa ki kot ki sla jong baroh ki nongtrei bar jylla kiba trei ha kane ka karkhana ban pynthikna ba kim dei ki nongtrei ba wan rung beaiñ.
