Shillong, Jymmang 22: Ka Federation of Khasi Jaiñtia &Garo People (FKJGP) kala dawa ïa ka Sorkar Jylla ba kan sei madan haba shit haba shai ïa ka jingshem ne ka kaiphod jong ka Inquiry Commission kaba tohkit ïa ka jingshah siat ïap u Bah Cheristerfield Thangkhiew, Nongïalam barim ka Hynñiewtrep National Liberation Council (HNLC).
“Ka Sorkar kam dei ban dang pynslem ban sei madan ïa ka jingshisha baroh bad kam dei ruh ban dang aidaw ba ka kaiphod ka dang long ‘highly confidential’ (bym pat long ban sei madan)” ong u Bah Dundee C Khongsit, Working President ka FKJGP ha ka kyrwoh.
Kat kum ka jingong jong u, ki paidbah ki dei ban tip aiu ka jingshem jong ka jingtohkit khnang ba kin ym sah satia ha ka umdum.
Ka Inquiry Commission bala khlieh da u Chairperson ka Meghalaya Human Rights Commission Justice (rtd) T. Vaiphei, kala aiti ïa ka kaiphod jingtohkit myn ha ka sngi thohdieng bala lah ha u Myntri Rangbah ka Jylla Conrad Kongkal Sangma haba pyntip ba ka shimpor haduh hynriew bnai ïa u ban pynkhreh ïa ka kaiphod hadien ka jingshong bishar haduh 20 sien kynthih.
“Ka Seng ka sngew ba kaei kaba la pyn khyndai bnai (Nailar 2021-Jymmang 2022) kala ih mynta ban paw lut ki jingshisha. Lada ka sorkar kam nud ban pyni paidbah ïa ka kaiphod kaba la sakhi da ki 12 ngut bad ha ka jingshong bishar ba palat 20 sien kynthoh, ka pynpaw shai ba ka Sorkar Jylla ka kwah ban buhrieh ïa ki jingshisha” ong u Bah Dundee.
Une u Nongïalamka FKJGP ula ong “Ka Seng ka dap da ka jinglynga pisa ban tip ïa kaei kaba don ha katei ka kaiphod namar kumba ka long mynta hi, katei ka jingjia ba jia ha ka 13 tarik Nailar 2021, ka dang buh hapdeng ka jingsah dum ym tang ïa ka seng hynrei ïa ki Nongshongshnong ka Jylla baroh kawei”..
“Lada mih kano kano ka jingïakhih paidbab sa shisien pat kaba lah ban ktah ïa ka jingshongsuk shongshngaiñ ha ka Jylla, ka Sorkar hi kan hap ban shim ïa ka jingkitkhlieh” ula bynrap.
Kumban shu pynkynmaw, u Bah Cheristerfield Thangkhiew ula shah siat ïap hala ka jong ka Ïingsah ha Mawlai Kynton Massar ha ka step jong ka 13 tarik Nailar.
Ki Pulit kila kynnoh ba une u Nongïalam barim ka seng kaikhlaw ula ïakhun ïa ka kynhun ki Pulit da ka tari katba ki dang pyrshang ban kem ïa u halor ka jingdonkti ha ki artylli ki jingjia pynbthei bomb IED ha Iew Laitumkhrah kaba jia ha ka 10 tarik Nailar bad ka Khliehriat Police Reserve ba jia ha ka 14 tarik Naitung.
Ha ka 15 tarik Nailar kaba dei ka sngi rakhe ïa ka Sngi Laitluid ka Ri, ka Nongbah Shillong kala sakhi ïa ka jing ïakhih ba tyngeh jong ki paidbah kiba dawa ïa ka jingbishar ba hok halor ka jingsiat ïap ïa une u Nongïalam barim ka HNLC.
Kawei ka kali Pulit kala shah wiang ding ha ki samla ha Jaiaw bad ki Pulit pahara kila shah knieh haduh lai tylli ki suloi INSAS na Mawlai Mawtawar ïa kiba la lap pat ha ka 23 tarik Nailar na Wah Umkhrah.
