Khliehriat Iaiong 21: Katkum u kyrwoh ba la phah da ka Federation of Khasi Jaiñtia and Garo People Lakadong Ummat Unit, East Jaiñtia Hills District, la ong ba na ka daw ba sniew ka machine trans former, ka shnong Lakadong Ummat ka la shu shong dum khlem bor ding electrict mynta la don kumba ar bnai, kane ka la buh jingeh ïa ki paidbah, halor kane, u President jong katei ka unit, u Leki Hynthong, u Secretary katei ka Unit u bah Kynmoobha Patwat lem bad ki dkhot hynnin ka sngi ki la leit ban ïa kynduh ïa u Sub-Divisional officer jong ka tnat MeECL Moowakhu, u bah I.Iakai ha kaba ki la iakren halor ka jingduh bor ding bad ki la buh ruh da ka jingthoh.
Na ka liang kitei ki nongialam ka seng, ki la buh ka jingkyrpad bad kyntu jur ïa u Engineer bad u SDO ba kin sngewbha ban shim khia ban buh noh da kawei ka machine transformer ha shnong Lakadong Ummat namar ki paidbah khamtam kito kiba ju siew ïa ka bai bor ding ki ïa kynduh jingeh namar ka jingduh bor ding.
Ha kajuh ka por ka seng ka la ong ruh da kaba shai ba ka dei ka kamram jong ka ophis ban pynbiang ïa ka bor ding sha ki paidbah kiba pyndonkam bor ding bad ka dei ruh ban pyrkhat na ka bynta kito kiba ju siew hok ïa ka bai bor ding bad ka dei ruh ka kamram jong ka ophis ban leh ei ei ïa kito kiba leh pyrshah ïa ka jingpynbeit ka ophis, namar tang na ka daw ba don bun ki bym siew bai bor ding yn shu pynduh bor ding lang ïa baroh kata ka bym lah ban long, pynpaw ki nongialam ka seng.
Na ka liang u SDO, u bah I.Iakai, u la ong ba un sa shim khia ïa kane ka jingduh machine transformer ka shnong Lakadong Ummat bad ong ruh ba un sa pynsngew sha ki bor ba halor, u pynpaw ruh ka jingsngew khia halor ka jingkheiñ sting ki paidbah ban siew ïa ka bai bor ding bad ong ba dei na kane ka daw ban sa shem jingeh ban ioh da kawei pat ka machine transformer ha shnong.
