Dawa ka ECC ïa ka Sorkar MDA ban khang khyrdep ïa ki Karkana Coke beaiñ

Shillong, Nailur, 20: Ka Environment Coordination Committee (ECC) Elaka Sutnga, East Jaiñtia Hills District ha ka sngi Baar ka la dawa ïa ka Sorkar Jylla ba ka dei ban thaw noh da ka Action Plan khnang ban tehlakam ïa ka jingdon jong ki karkhana saiñ rnga dewïong be-aiñ ne ki Coke Factory hapoh u pud u sam jong ka Elaka Sutnga.
U President ka ECC u Bah Never Lamurong ha ka jingïakren bad ki lad pathai khubor u la ong, “ka National Green Tribunal (NGT) Eastern Zone, Kolkata ka la pynmih ïa ka jingbthah ba ka Sorkar Jylla ka ban pyntreikam noh mardor ïa ka Action Plan la kumno kumno ha lane shwa ka 8 tarik, Naiwieng, 2022 bad ba kino kino ki karkhana saiñ rnga dewïong kiba pynieng ha shwa ka 23 tarik, Nohprah, 2020 ki dei ban ïoh shwa ïa ka Consent to Operate (CTO) bad ïa kino kino ki bym bud ïa ki kyndon ba la buh dei ban khang khyrdep noh shisyndon shwa ka ka 8 tarik, Naiwieng, 2022.”
U la ong ba ka ECC ha ka dorkhas ba la phah sha u Myntri Rangbah u Conrad Kongkal Sangma ka la ai jingmut ïa ka Sorkar ba kan pyntreikam noh mardor ïa ka Action Plan katkum ka jingbthah jong ka NGT.
“Ban pyntreikam ïa ka Action Plan hapoh saw bnai, kata, ha shwa jong ka 8 tarik, Naiwieng, 2022. Baroh ki karkhana saiñ rnga dewïong ba plie be-aiñ kiba pynieng ha shwa ka 23 tarik, Nohprah, 2022 bad kiba la ïoh ïa ka Consent to Operate (CTO), hynrei ki bym lah ban bud ïa ki kyndon ba la pruiddak dei ban khang khyrdep noh shwa ka 8 tarik, Naiweing, 2022,” la ong u Bah Lamurong ha ka jingai jingmut ïa ka Sorkar.
“Lada don kano kano ka jingpynkynriah ïa ki karkhana saiñ rnga dewiong kaba long katkum ka Action Plan, ym dei ban ai jingbit shuh ïa kine ki karkhana ba kin dang plie hapoh u pud u sam jong ka Elaka Sutnga lane ha East Jaiñtia Hills District.,” la ai jingmut ka ECC bad bynrap, “lada ladep ithuh ïa kano kano ka jaka ha kano kano ka bynta jong ka jylla ka dei ban don sha jngai na ka shnong ba shong basah ki birew.”
U Bah Lamurong u la ïathuh ruh ba ka ECC ka la ai jingmut ïa ka Sorkar ba kam dei satia ban pynbna ïano kano kano ka jaka kum ka Industrial Area lane Commercial Area hapoh u pud u sam jong ka Elaka Sutnga.
“Ym dei satia ban ai jingbit ïa ki karkhana saiñ rnga dewïong ba kin don lang shi jaka bad ïa ki karkhana kiba don tang ha kawei jaka ym dei satia ban pynkylla kum ka shi lynnong,” u la ong.
Shuh shuh u la ong ruh ba ka ECC ka la ai jingmut ïa ka Sorkar ba kam dei ban ai jingbit ba ki karkhana saiñ rnga dewïong ban plie hapoh u pud u sam jong ka Elaka Sutnga ha ki snem ki ban sa wan.
“Ynda la kut ka por ïakut, ïa baroh ki karkhana saiñ rnga dewïong dei ban phah pynpra noh mardor bad ban thung bujli da ki dieng ki siej khnang ban pynjyrngam biang ïa ka mariang,” la ai jingmut ka ECC.
“Ïa ka jingsiew bailutksan ban pynjyrngam biang ïa ka mei mariang ïa kaba la pynjari sha ki 31 tylli ki karkhana saiñ rnga dewïong bapher bapher kaba kot haduh T.5.5 klur dei ban phah siew ha shwa ka 8 tarik, Naiwieng, 2022. Ïa kane ka pisa dei ban siew sha ki shnong kiba la shah ktah na ka jingdon jong ki karkhana,” la dawa ka ECC.
Ha kaba ïadei bad kane, ka ECC ryngkat lang bad ki Waheh Shnong kiba hap hapoh ka Elaka Sutnga ha ka kyrteng jong ki Dorbar Shnong ka kyrpad ruh ïa ka Sorkar Jylla ban leh noh kham kloi ïa kine ki jingdawa bad ki jingai jingmut hynrei lada ka Sorkar kam lah ban pyntreikam ha shwa ka 8 tarik, Naiwieng, 2022 ka ECC bad ki Waheh Shnong kim banse ban shim da kawei pat ka siennam ba tyngeh.