Shillong, Jylliew 28: Ka Damalgre United Youth Welfare Society (DUYWS) da kaba kam ba ka ieng ban ïakhun ïa ka jingeh ïa ki samla pule bad ki kmie ki kpa jong ka South West Garo Hills, ka kyntu ïa u Myntri Rangbah ka jylla, Conrad K Sangma ban tuklar lang na ka bynta ban pynkylla ïa ka por pynlip bording ha ka thaiñ.
Ha ka dorkhas, ka Seng ka la pynpaw ïa ka jinglyngoh kumno ka jingpynlip bording ka treikam wat ha ka por ba slap ruh ba pahuh ka um. “Kane kadei ka por ba ki skul ki dang pynlong ïa ka eksam shiteng snem ha baroh kawei ka jylla. Don ki skul kiba la sdang ïa ka eksam ha ki bynta jong ka rilum Garo bad don pat kiban sdang ïa ka naduh ka 27tarik Jylliew, 2022,” ong ka seng ha ka dorkhas.
Katkum ka seng, la ong ba ka South West Garo Hills ka ju sakhi ïa ka jingpynlip bording hapdeng ka por 7:30 baje janmiet haduh 9:30 baje mynmiet kaba long ar kynta man ka miet bad ruh naduh ka por 1:00 baje mynstep haduh 5:00 baje mynstep kaba long saw kynta man ka sngi kaba la buh jingeh haduh katta katta ïa ki khynnah kiba pynkhreh ïa ka eksam.
Ka Seng ka ong ruh ba kane ka lah ban poi haduh u pud ba ki samla pule kin ym lah wat ban pass bha bad kan ktah ruh wat ïa ka rukom pass jong ki ha ki eksam bapher bapher.
“Ha kane ka juk mynta, ka bording kadei kawei na ki bynta ba kongsan tam ha ka jingim briew. Ngi donkam ïa ka man ka sngi ban pyndep ïa ki kam ki jam jongngi, kumta, ka jingbym tikna ka bording ka lah ban ktah lut ïa ki kam ki jam jong ki nongshong shnong ha ki liang baroh,” bynrap shuh shuh ka seng ha ka dorkhas.
