Shillong, ïaïong, 09: Ka Confederation of Ri Bhoi People (CoRP) hapoh ka jingïalam u Vice President u Bah Gershome Hat bad u Finance Secretary u Bah Ashok Khongsit ha ka 5 tarik mynta u bnai ki la ïakynduh ïa u Symbud Myntri Rangbah jong ka Jylla u Bah Prestone Tynsong ban dawa ïa ka Sorkar ba ka dei ban kyntiew kyrdan ïa ka Patharkhmah Administratine Unit sha ka Civil Sub-Division.
Kane ka jingpynsngew jong ka Seng ka long naba ki paidbah jong ka thain ri Bhoi sepngi ki la mad jingeh ban pyndep ïa ki kam haduh Nongpoh namarba ka la jngai bad sa ka jingsniew ka surok kaba pynïasoh ïa ka shnong Umling sha Patharkhmah.
Ka CoRP ka la kyntu ruh ban pynstet ïa ka jingtrei ïa ka jingtrei ïa ka surok Umling- Patharkhmah kaba long u budlum ïa ka roi ka par ki paidbah ka thaiñ Ri Bhoi sepngi bad kumjuh ban pynbha ïa ka jingkieng Dwar Ksuid namarba ka la buh jingeh ïa ki paidbah nongleit nongwan khamtam ha ka leit ka wan bad ka rah ka rong.
U Bah Prestone u la pyntip sha ki nongïalam ka Seng ba ka Sorkar Jylla ka la shimkhia ban kyntiew kyrdan ïa ka Patharkhmah Administrative Unit naba ka sngewthuh ïa ka jingeh ki paidbah ka thaiñ Ri Bhoi Sepngi namarba ka la jngai na ka Nongpoh.
U la ïathuh ba ka tnat PWD ka la kwah ban pyndep noh kham kloi ka jingtrei ïa ka surok Umling-Patharkhmah kaba dang ïaid mynta bad kumjuh ruh ka National Highway Authority of India (NHAI) ka la ïaid shakhmat ban khot Tender na ka bynta ban shna pynbha ïa ka jingkieng ha Dwar Ksuid bad shen ïa ka jingtrei yn sa lah ban sdang noh ha u bnai wan.
