Shillong, Jymmang 27: Ka Meghalaya Pradesh Congress Committee (MPCC) kala dawa ïa ka Sorkar Jylla ban thung da ka jingtohkit jong ka Central Bureau of Investigation (CBI) halor ka jingkynnoh khaïi be-aiñ ïa u dewïong hapoh ka Jylla.
“Ngi dawa ïa ka Sorkar ba ka Sorkar kan thung mardor ïa ka jingtohkit CBI halor ka kam khaïi be-aiñ ïa u dewïong” ong ka Deborah Marak Working President ka MPCC bad Myntri barim ka Sorkar Jylla.
Kane ka Heh Congress kala pyntip ba bun bah ki trok kit dewïong be-aiñ ki dang ïaid manla ka miet lyngba ka Dainadubi bad Gasuapara.
Kala kynnoh ruh ba ki don bun ki dallal kiba donkti ha kane ka jingkhaïi tuh bad ong “Ym tang ka Jai Maa Enter prise hynrei ki don ruh ki trai shnong kiba donkti bad ba iatreilang ha kaba kila ïoh lum bun bah ka pisa na ki trok”.Ka Deborah kala ban jur ïa ka jingdonkam ban tohkti bad ban leh eiei pyrshah ïa kine ki dallal.
Ka Deborah kala dawa ruh ïa u Myntri Rangbah ka Jylla Conrad Kongkal Sangma ba u dei ban bthah ïala u jong u hynmen bad Myntri Sorkar James K Sangma ba u dei ban hiar shuki noh mardor lada shem ïa ka jingdonkti jong u ha kane ka kam bymman.
“Hynrei, tad haba phi la thung ïa ka jingtohkit ba laitluid phin sa tip na tynrai ïa kaei kaba jia ha kane ka Sorkar. Man ka por ngi kren halor ki kam bamsap bad ki jingtohkit kim ju don satia, ngim lah shuh ban peiphang” ong ka Deborah.
“Namar kata, ban tip ïa ka jingshisha, ki dei ban khot ïa ka kynhun ba laitluid ba kin leh ïa ka jingtohkit kaba bniah. Lada ki lah ban khot ïa ka CBI, ki lah ruh ban phah tohkit lang ïa baroh ki jingkynnoh bamsap da ki paidbah pyrshah ïa ka Sorkar Jylla” kala bynrap.
