Dawa ka CoMSO ïa ka GHADC ban peitngor ïa ka jingpyndonkam bakla ïa ka laisen khaiï

Shillong, Ïaïong 25: Ka Confederation of Meghalaya Social Organizations (CoMSO) ha ka sngi Thohdieng ka la dawa na ka Garo Hills Autonomous District Council (GHADC) ban leh eiei noh mardor halor ka jingnang kiew ka jingwan buhai shnong ki mynder ri ha Ri-lum Garo bad ka jingpyndonkam bakla ïa ki Trading Licence ki riewlum, nangta ka jingai ïa ka Trading by Non-Tribal (TNT) and hawkers licence sha ki bar jylla khlem da pynshisha.
Ha ka dorkhas na ka liang ka CoMSO ha ryngkat ki nongïalam na ki synjuk bapher bapher bad ki nongmihkhmat ka imlang sahlang, ki la aiti sha u Chief Executive Member (CEM) ka GHADC, u Albinus R Marak ba un leh eiei halor ki mat kiba ka seng ka la buh hakhmat jong u.
Ki katto katne ki mat ba kongsan ha ka dorkhas ki kynthup ïa ka jingdawa ban pynsangeh noh mardor ïa ka jingai ïa ka TNT License sha ki bar jylla kat bym pat dep pynthikna bha ïa ki bad ka rukom pynbeit kaba bniah ha kaba ïadei bad kane.
Na ka liang ka CoMSO ka la dawa ruh ban pynsangeh noh ïa ka jingai laisen ïa ki nongshong dukan madan ban khanglad ïa ka jingkhaiï beaiñ ha surok da ki briew ki bym dei ki trai ri trai muluk ne trai jylla bad ban buh ïa ka rukom lum jingthoh kaba ryntih ban tehlakam ïa ka jingwan rung ki briew ba nabar sha ka jylla, ban buh jingthoh da ki kor digital ïa ki Licence bad ki kam khaïi, kynthup ka TNT, ki nongshong dukan madan bad ki dukan kaba lah ban ïoh peit ki paidbah ha kano kano ka por nalor ban pynïeng ïa ka TNT Licence Check Gate ha ki jaka rung bad jaka ïaid lynti ka khaïi ka pateng ha Ri-lum Garo ban lah buddien ïa ka khaïi ka pateng.
Halor kane ka la dawa ruh ïa ka GHADC ba kan pynsangeh noh mardor ban ai ïa ka Tribal Trading Licences sha ki bar jylla lyngba ka jingïapynbeit proxy, kaba pynduhjait ïa ka jinglong tynrai jong ki jingïada ïa ka ïoh ka kot jong ki riewlum kane ka thaiñ.
“Ngi dawa ruh ïa ka GHADC ba kan mynjur ïa ka Resolution kaba kyntu ïa ka Sorkar jylla ba kan rah ïakren sha ka Sorkar Pdeng na ka bynta ban pynkylla ïa ka Scheduled Tribes Order, 1950, khnang ban pynbeit ïa ki jingbym ïahab kiba la slem bha bad ban ïada ïa ki jinglong tynrai jong ki jaitbynriew riewlum ba shisha,” pynpaw ka CoMSO ha ka dorkhas.
Ha kajuh ka por, ka CoMSO ka la ban jur ïa ka jingdonkam ba ka GHADC kan pynlong ïa ka dorbar kyrpang jong ka council kham kloi kat kaba lah ban ïakren halor kine ki mat bad ban mynjur ïa ka resolution halor kine ki jingtyrwa jong ka seng.