Shillong, Nailar 31 : Ka Bharatiya Janata Party (BJP) mynta ka Sngi Balang ka la dawa ïa ka sorkar ban weng kam shipor ïa u Assistant Inpector General of Police (AIGP) Administration (A) u bah G.K Iangrai halor ka jingpyndonkam jongu haduh 29 tylli ki kali bad kumjuh ruh ban aiti tohkit ruh halor kane ka kam sha ka tnad CBI.
Ha kajuh ka por ka BJP ka pynpaw ba kan ïaid noh da ka lynti ka aiñ ban dawa thung ïa ka jingtohkit ba laitluid halor ka jingkem ïa u Vice President jongka uba dei u MDC ka Tura u Bernard N Marak.
Ha ka jingpyllait khubor na u Executive Member jongka BJP u Pawan Sharma, u la kynthoh pyrshah ïa ka sorkar halor ka jingkem ïa u Bernard bad kumjuh ruh kynnoh ïa ki kynthei kiba la rah na ka Rimpu Bagan kum ki thei ba ïaleh kam awria. U la kynnoh ba kane ka dei ka jingleh politik da kaba pyndonkam pat da ki bor pulit. Kumta ka BJP kan wad noh da ki lynti ka aiñ ban dawa thung da ka jingtohkit ba laitluid halor kane ka jingkem ïa u.
U la ong kumba la pynpaw da u SP ka West Garo Hills ba ka don tang kawei ka lad pathai khubor kaba la ïoh ban ring halor ka jingkhynra ïa katei ka ïing basa Rimpu Bagan bad kane ka dei ka lad pathai khubor ba la pynïaid da uba haïing jong u Myntri Rangbah ka jylla hi. U la kynnoh ba kane ka pynpaw ba ka don kaei re kaei sha lyndet.
U la kynnoh ba ka jingpyndonkam bakla pat ïa ka bor kaba long kawei na ki kam bamsap da u AIG (A) G.K Iangrai bad kane ka la pynlong ïa ki paidbah ban duh ka jingshaniah ha kane ka sorkar. Kumta la dei ban aiti tohkit noh sha ka CBI namar kumno kat ïa kane ka kam yn tohkit hi da ki pulit ophisar. Lada ka sorkar ka don ka jingsngewkhia halor kane ka kam ka la dei ban weng kam shwa shipor ïa une u pulit ophisar.
U Pawan ula kynnoh ruh ba ki pulit ki la nang kynton ki jingkynnoh ïa u Bernard da ka jingthmu ban pynkut syndon ïaka ka lawei jongu ha ka saiñ pyrthei namar ïa ka jingkiew dor ha ïew Tura ruh la kynnoh bad pynngat kyndon ïa u.
Kane ka pynpaw shai ba ka don ka jingbthah bad hukum nalor. U la kynnoh ïa ka bank account jong u Bernard bad ka kurim jongu la phah khang da ki pulit katba ïa u Iangrai pat ym shym la leh ei ei namar u ïaid laitlan katba u mon nalor ba thung ïa u kum u commandant ka SF 10.
