Dawa ka BJP ban thung kynhun tohkit laitluid halor ka ka jingkhynra ïa ka Farm House u MDC

By Mawphor Editor On Aug 2, 2022

Shillong, Nailar 01: Ka BJP Meghalaya ha ka sngi Nyngkong ka la pynlong ïa ka jingïakhih ba jaijai jong ka pyrshah ïa ka jingshah pyndik ki nongtrei jong ka party khamtam eh ha ki bynta jong ka Garo Hills. Ka BJP ka la leit ruh ban ai dorkhas ha u Lat ka jylla ba un tuklar, ba ka sorkar ka dei ban weng noh ïa u SP bad u DC jong ka West Garo Hills bad ban ban thung kynhun tohkit laitluid halor ka jingleit khynra ki pulit ïa ka ïing u Bernard R Marak u MDC jong ka BJP.
Haba kren bad ki lad pathai khubor u President ka BJP u Bah Earnest Mawrie u la ong ba ka BJP ka dawa ba ka sorkar ka dei ban weng kam noh ïa u SP bad u DC ka West Garo Hills khnang ba kan don ka jinglaitluid ka jingtohkit ïa u Bernard R Marak bad ban sahngeh noh shisyndon ka jingkhniot beiñ ïa ki dkhot bad ki nongtrei jong ka Party.
Shuh shuh u la ïathuh ruh ba ha ka jingleit ïa kynduh bad u Lat ka BJP ka la dawa ba dei ban thung kynhun tohkit aitluid ban khlieh da u nongbishar halor ka jingleit khynra ki Pulit ïa ka Farm House u Bernard R Marak khnang ba kan don ka jingtohkit kaba shai halor kane ka kam.
“Peit ha ka por kaba ki don ka jingleit khynra balei ki ïalam tang ïa uwei u nongthoh khubor ban synran ïa ki pulit” u la ong.
“Na ka liang u Lat u la kular ba un shim khia ban ïakren bad ka sorkar halor kane ka jingdawa jong ngi” u la ïathuh.
Haba la kylli pat la ka BJP kan leit ai dawa ne em na u Myntri Rangbah ban thung da ka kynhun tohkit laitluid u Bah Earnest u la ong, “Shen hi ngan sa leit ban ïa kynduh bad u Myntri Rangbah halor kanwe ka kam” u la ong
Halor ka jingïakhih kaba ki la pynlong pat ha ophis ka BJP u Bah Earnest u la ïathuh “Kane ka jingïakhih ba jaijai jong ka BJP ka long shi bynta ban pyrshah ïa ka jingshah pyndik ki nongtrei jong ha ha Rilum Garo khamtam eh u General Secretary ha ki pulit kiba la khot hajir khah khah khlem pynlong pat kano kano ka jingkylli ïa ki. U Bah Earnest u a ong ba lada ka seng kan shu sngap jar kito kiba don ha ka bor kin pyndonkam bakla ban pyntieng pynmsiej ïa ki paidbah ba kin nym dei ban kyrshan ïa ka BJP.”
“Ka jingpyntieng pynsmiej kan jur bha khamtam ha kito ki jaka ba shong khleh jaidbynriew kum ha Pynthorumkhrah, North Shillong, West Shillong bad kiwei ki constituency ba shong khleh jaid bynriew na kata ka daw kum ka seng kaba ngeit ha ka hok laitluid kaba ai ka Riti Synshar ngim ai lad ba kin leh katba mon” u la ong.