Shillong, Naitung 17: Ka seng BJP ha ka sngi Balang ka la pynlong ïa ka jingrakhe ïa ka lyngkhuh sngi ïap ba 189 snem jong u Syiem Tirot Singh u syiem jong ka Hima Nongkhlaw u nongïaleh laitluid pyrshah ïa ki phareng da kaba leit ban buh syntiew hakhmat dur mot jong u ha State Central Library Shillong.
Ha kane ka sngi ka BJP ka la buh ïa ka jingdawa na ka sorkar pdeng ba kum ka jingburom ïa u Syiem Tirot Sing nongïaleh laitluid pyrshah ïa ki phareng ban pynsah nam ïa u da kaba buh ïa ka dur mot jong u ha phyllaw jong ka dorbar Parliament.
Ym tang katta ka BJP ka la dawa ruh ban pynmih biang ïa ka stamp jong u Syiem Tirot Sing bad ha kajuh ka por ba ka tnat pule puthi kan pynrung noh ha ki kot pule ïa ka jingleh jong u ïa ki phareng ba ki longdien kin tip shaphang jong u Syiem ba khraw ka Hima Nongkhlaw ha ka ri baroh kawei.
Ïa kane ka jingdawa la ïakren ha ka jingïalang hapoh ka ophis jong ka party ha kaba u Bah Khrawboklang Basaïawmoit Vice President, Bah David Kharsati bad u nongaiktien ka party u Bah Mariahom Kharkrang, ka Dr. Fenela Lyngdoh Nonglait ruh kila kren ha kane ka jingleh burom.
Ha kane ka sngi hadien ka jingbuh syntiew ha ha State Library ki la pynlong ruh ïa ka jingpynkhuid ïa katei ka jaka, ïa kane ka jingleh burom kila leit ruh sha Nongkhlaw ban pyndon burom ïa une u nongïaleh laitluid bakhraw.
