Shillong, Risaw 10: Ka BJP Meghalaya ka la pynrem jur halor ka jingshah pynïap jong uwei u heprit ba la 7 snem u Kyrshanbor Kharmudai bad ka la dawa ruh ba dei ban kem kloi ïa ki runar kiba donkti halor kane ka kam ka bymman.
Haba kynthoh halor kane, u Nongaiktien ka BJP u Bah Mariahom Kharkrang u la ong ba kane ka jingjia ka la pynkyndit ïa baroh ki nongshong shnong ka jylla ba kynthup ruh ïa ka party.
“Da ka jingmut jingpyrkhat kaba ym sngewlah shuh ban mutdur halor kane ka jingleh kaba khlem pyrkhat shuh, ka state BJP ka la pynrem jur ïa kane ka kam runar kaba khlem sngew shuh ïa ka hok longbriew manbriew bad ka seng ka pynpaw ka jingsngewlem sha ka longïing kaba la mad ïa kane ka jingjia kaba sngewsih halor ka jingduh noh ïa ka mynsiem jong uwei na ki dkhot ka ïing,” u la ong da kaba bynrap, “Ka party ka angnud ba ki runar kiba donkti ïa kane ka kam kin shah kem noh kloi bad ba ki longïing kiba mad ïa kane ka jingjia kin ïoh ïa ka jingbishar kaba hok da ka Ïingbishar.”
Ka state BJP ka la kyrpad ruh ïa ki paidbah ba kino kino kiba don ki jingtip kaba lah ban ïarap ban ïohkem ïa kiba donkti ha kane ka kam runar ba ki dei ban wan shakhmat bad ban sam ïa ka jingtip bad ki pulit.
“Aiba ngin ïatreilang bad ban ïarap ïa ki pulit, ban pynthikna ba kum kine ki jingjia kim dei shuh ban dang jia hadien habud,” bynrap u Bah Kharkrang.
