Dawa ka AMDWU ïa ka Sorkar ban thaw da ka Welfare Board na ka bynta kiba trei ïing briew

Shillong, Jylliew, 15 : Ka All Meghalaya Domestic Workers Union ka la dawa ïa ka Sorkar MDA-II ba kan thaw noh da ka Welfare Board ka ban peit ïa ka khia ka shon bad ka jingeh jong ki nongtrei iing briew kiba don ha ka jylla baroh kawei.
Ha ka jingïakren bad ki lad pathai khubor ha ka sngi Balang, ka Board Member jong ka All Meghalaya Domestic Workers Union ka Kong Elbina Nongkhlaw ka la ong ba ka Union ka ladep aiti da ka jingthoh sha u Myntri Rangbah ka Jylla u Conrad Kongkal Sangma hynrei haduh mynta ka Sorkar kam pat lah eiei.
Ka la ïathuh ruh, namar ka jingbym leh eiei jong ka Sorkar, ka Union kam banse ban pynmih hi ïa ka Wages Card kaba buh ïa ka dor siew bai bylla sha ki nongtrei iing briew ïa kaba la pyntreikam salonsar ha ka jylla baroh kawei, katkum ka kam kaba ki nongtrei ing briew ki ai ka jingshakri ïa ki trai iing.
Ka la ïathuh ba ka jingdawa jong ka Union ka long ba ka Sorkar ka dei ban thaw da ka Welfare Board ka ban thaw da ka aiñ na kabynta ban ithuh da ka aiñ ïa ki nongtrei iing briew, ban ai jingïada, ban buh ïa ka dor bylla jong ki nongtrei ing briew, ban ai jinghikai ha ki liang bapher bapher.
Ka Kong Nongkhlaw ka la ong ba ka Board ka dei ban lum jingkheiñ ïa ki nongbylla iing briew bad ban thaw da ki aiñ kiba ïada ïa kiba trei ing briew, ban pynrung kyrteng ïa ki nongtrei iing briew bad ban khmih bniah wat ha kaba ïadei bad ka jingsiew bainong katkum ka Minimum Wages.
Ka Merina Sangma haba bynrap halor kane, ka la ïathuh ba katkum ka jingïoh ujor jong ka Union, ki don ki dkhot kiba la pyntip ba ki ïoh ïa ka jingsiew bainong kaba tad, ka jingshah pyntrei bun kynta, ka jingbym ïoh jingsiew lada pep bylla, ka jingshah kren beiñ, ka jingbym biang ïa ka shong ka sah, ka jingbym don ki skhim jingïarap na ka bynta ki kynthei kiba im bylla kum ki nongtrei ha ki ing briew bad kiwei kiwei.