Shillong, Naiwieng 22: Ka All Jaintia Muster Roll Workers Union ka la dawa na ka sorkar ban pyntreikam ïa ka dor kaba ïa biang lang bad kumjuh ruh ïa ka variable dearness allowance (VDA) kumba la pynlong kongsan da ka Minimum Wage Act 1948, ha ryngkatlang bad kiwei ki jingmyntoi ne ki social security, la kumno kumno ba kin ttreikam hapoh ka 10 tarik mynta u bnai.
U Nongaibuit ka Union, u Bah Khroo L Pariat, u la ong ba ïa kane ka rai la shim ha ka jingïalang ki nongtrei muster roll na kylleng ka jylla, kiba la pynpaw ka jingsngewkhia halor ka jingbym shim khia jong ka sorkar ha kaba ïadei bad ki aiñ kiba don.
“Ngi la rai ba ngin leit ïakynduh bad ka sorkar ba kan pyntreikam ïa ka jingsiew kaba biang na ka bynta ki nongtrei bad kumjuh ruh ban pyntreikam ïa ka VDA katkum ba dei ban long, kumba long ha kiwei pat ki jylla jong ka India,” ong u Bah Pariat.
“Ka sorkar ka dei ban pyntreikam ïa kine ki jingkyrpad bad ngi kyrmen ba u Myntri Rangbah u Conrad K Sangma bad ki Myntri ba kin shim khia ïa kane ka jingkyrpad.”
Ka Union ka la pynpaw ruh ka jingsngewkhia halor ka rta shongthait jong ki muster roll, da kaba kdew ïa ka hukum 2009 order na u Lat ka jylla Meghalaya, kaba on ba ka rta shongthait kam dei ban palat ïa ka 65 snem.
Shuh shuh, ka Union ka la pynpaw ïa ka kam shuti ki longkmie armet kaba la shah kyntait da ki women Muster Roll workers, wat ba don ka Maternity Act.
Ka Union ka la pynpaw ka jingsngewkhia halor ka jingbym pyntreikam ïa ka Employees Provident Funds (EPF) Act, wat hapdeng ba la phah ka jingthoh na ka Regional Commissioner, EPFO, Shillong, sha u Chief Secretary ha u Ïaïong 2025.
Ka la ong ba lada ka sorkar kam pyndep ïa kine ki jingdawa hapoh ka 10 tarik u Nohprah, ka seng kan pynjur ki jingïakhih kaba kynthup ka jingrakhe ïa ka Christmas hakhmat Secretariat.
