Shillong, Nohprah 16 : Ka ACHIK ka la dawa ïa ka Sorkar Jylla ban thungkam noh mardor ïa ki nonghikai bad ki nongtrei ha ka Captain Williamson Sangma State University (CWSSU) da kaba bud ryntih kat kum Reservation Policy ne ka bhah thungkam thung jam hapoh ka jylla.
“Ngi kyntu ïa ka State University bad ki Tnad ba dei khmih ka Sorkar ba pynïaid noh mardor bad pyndep ban pynbna ïa ka jinglaitkam nonghikai bad nongtrei khnang ban pynthikna ba ka University kan don ïa ki nongtrei kat kum ka jingdonkam bad kiba aiti lut” ong ka ACHIK ha ka kyrwoh.
“Ngi dawa ban pynthikna ba ka jingthungkam naduh baroh ki kam nonghikai bad nongtrei ba pura, dei ban bud kar kum ka Meghalaya State Job Reservation Policy u snem 1972 bad ki jingbthah ka Sorkar” kala bynrap.
Kane ka seng kala ong ba ka jingshahniah ha ka thungkam adhoc bad ba shipor kan ktah jur ïa ka jingbha bad jingïai bteng ki jingai jinghikai ha ka skulbah, kan pyndkoh ïa ka jingtreikam ki bor pynïaid bad pynduhlad ïa ki kyrtong ba don ka kyrdan ba kin ïoh ïa ka kam kaba neh skhem.
Ha kajuh ka por ka kyntu ïa ki bor khmih ban pynthikna ïa ka jingshai bad jingleh khlem shah liang ha ka jingthungkam, haba pynthikna ïa ka hok bad jingïohlad ban ïohkam na baroh ki Jaidbynriew.
