Shillong, Risaw 31: Ka Achik Conscious Holistically Integrated Krima (ACHIK) ka la dawa na u deputy commissioner jong ka South Garo Hills ban pynmih ïa ka hukum ban pyrkhing ïa ki kam khaïi ba khlem aibor hapoh ka jaka jong ka ophis.
Ha ka shithi ba la phah sha u DC, u general secretary ka ACHIK South Garo Hills u Wilban N Sangma u la ong, “Hynnin ka sngi nga la ïohi ïa u nongdie jaiñ ba u la rung hapoh ka ophis DC bad u la die ïa ki jaiñ sha ki nongtrei ha ki kynta bad ki por ba dang dei por treikam bad katto katne ngut na ki nongtrei ki la ïabun kam ban jied ïa ki jaiñ bad u nongdie jaiñ uba la rung hapoh ka ophis. Ha ka jaka ba kin trei, katto katne ngut ki nongtrei ki la ïabun kam ban thied bad ban peit ïa ki jaiñ hapoh ka ophis.”
“Namar kata nga kyrpad ïa phi ban pyrkhing bad ban khang ruh ïa kino kino ki nongdie ne nongkhaïi ba kin ïoh rung hapoh ka ophis jong phi, khamtam hapoh ka general branch jong ka ophis badonburom jong phi bad ban bthah ïa baroh ki tnat hapoh ka jingpeit jong phi ban khang ïa ka jingwan ki nongdie jaiñ lane kino kino ki nongdie madan kiba khlem ïohbor ba kin wan rung hapoh ka ophis,” u la ong da kaba bynrap, “Kane kan ïarap ban pynneh ïa ka jinglong kyrpang ka sawdong sawkun bad ban pynthikna ba ki nongtrei kin pynleit jingmut ha la ki kamram jong ki. Ka ophis kam dei satia ka jaka ïew ne ka ïew ka hat, namar kata phi dei ban pyrkhing bad ban khang ïa baroh ki nongkhaïi ba kin wanrah bad die ïa ki jaiñ ne kino kino ki tiar hapoh ka ophis.”
